Գերմանիայում ընթացող «Եվրո-2024»-ում ավարտվեց խաղային երկրորդ օրը: Օրվա վերջին խաղում Եվրոպայի գործող չեմպիոն Իտալիայի հավաքականը 2:1 հաշվով կամային հաղթանակ տարավ Ալբանիայի նկատմամբ:

Հանդիպման հաշիվը 22-րդ վայրկյանին բացեցին ալբանացիները՝ խփելով Եվրոների պատմության ամենաարագ գոլը, աչքի ընկավ Նեդիմ Բայրամին:

Ալբանիայի ընտրանու ուրախությունը, սակայն, շատ կարճ տևեց, քանի որ Ալեսանդրո Բաստոնին 11-րդ րոպեին հավասարեցրեց հաշիվը, իսկ 5 րոպե անց Նիկոլո Բարելան առաջ մղեց իտալացիներին: Հանդիպման մնացած ժամանակահատվածում այլևս գոլեր չեղան:

Իտալիայի և Ալբանիայի հետ B խմբում ընդգրկված Իսպանիայի ու Խորվաթիայի միջև խաղում 3:0 հաշվով հաղթել էին իսպանացիները:

Հունիսի 16-ին կկայանան C խմբի Սլովենիա-Դանիա (20:00) և Սերբիա-Անգլիա (23:00) հանդիպումները, ինչպես նաև D խմբի Լեհաստան-Նիդերլանդներ (17:00) հանդիպումը:

Լուսանկարը՝ ՈՒԵՖԱ-ի