Ուկրաինան նոր պատժամիջոցներ է սահմանել 7 անհատների և 86 իրավաբանական անձանց նկատմամբ։ Նրանք կասկածվում են փողերի լվացման և մաքսանենգության մեջ։ Պատժամիջոցները տնտեսական և ֆինանսական բնույթի են, իսկ ժամկետները տարբեր են՝ 3, 5, 10 տարի և այլն։ 

Ազգային անվտանգության և պաշտպանության խորհրդի որոշումը երկրի նախագահ Վլադիմիր Զելենսկին ստորագրել է ապրիլի 4-ին։ 

Ցանկը հրապարակվել է Զելենսկիի պաշտոնական կայքում։  

Հայազգի սկանդալային գործարարի «արկածները»

Այս ցանկով պատժամիջոցների տակ է հայտնվել նաև հայազգի գործարար Արայիկ Ամիրխանյանը, որը նախկինում զրկված է եղել Ուկրաինայի քաղաքացիությունից և կասկածվում է մաքսանենգության մեջ:

Արայիկ Ամիրխանյանի մասին հայկական լրատվամիջոցներում տեղեկություններ չգտնվեցին։ Փոխարենը կան բազմաթիվ հոդվածներ ուկրաինական և ռուսական լրատվամիջոցներում։ Դրանցում Ամիրխանյանը, մեղմ ասած, լավ լույսի ներքո ներկայացված չէ։ 

Ամիրխանյանը խոշոր բիզնես է ծավալել շինարարության ոլորտում։ Հայտնի բիզնեսմեն է ուկրաինական Օդեսա քաղաքում։ Շինարարական բիզնեսով է զբաղվել նաև Ռուսաստանում։ 

Այս պատժամիջոցների նախապատմությունը գալիս է 2021 թվականից, երբ Զելենսկին արդեն պատժամիջոցներ էր սահմանել ֆիզիկական և իրավաբանական անձանց դեմ։ Այդ ժամանակ պատժամիջոցներ տակ էր հայտնվել նաև Արայիկ Ամիրխանյանը։ 

Պատժամիջոցների տակ է հայտնվել նաև նրան պատկանող ռուսական «Դորլիդեր»  (ООО «Строительная компания «Дорлидер») շինարարական ընկերությունը, որը Մոսկվայում պայմանագրեր է կնքել քաղաքի բարեկարգման աշխատանքներ իրականացնելու համար՝ ներառյալ ասֆալտի վերանորոգումը, մարզադաշտերի և այգիների բարեկարգումը: 

2021 թվականին Ուկրաինան որոշել է արգելափակել երկրում տեղակայված նրա ակտիվները, սահմանափակել առևտրային գործառնությունները, արգելել կապիտալի դուրսբերումը պետության սահմաններից և այլ սահմանափակումներ մտցնել։ 

«Դորլիդեր»-ն ու նրա սեփականատեր Արայիկ Ամիրխանյանը ավելի վաղ մեղադրվել են ճանապարհաշինության պետական գնումների մրցույթներում խախտումներ թույլ տալու, փոխկապակցված ընկերություններով մասնակցելու համար։ 

Ամիրխանյանին, ըստ RBC-Ukraine գործակալության, 2021 թվականին Զելենսկին զրկել է Ուկրաինայի քաղաքացիությունից, քանի որ նա ունեցել է Հայաստանի քաղաքացիություն։ Այդ ցանկում էր նաև գործարար Վադիմ Ալպերինը, որի անունը տեսնում ենք նաև այս նոր պատժամիջոցների ցանկում։

Իսկ մինչ այդ՝ 2019 թվականին, Ամիրխանյանը կալանավորվել է Ուկրաինայի պետական սահմանով անձանց ապօրինի տեղափոխելու մեխանիզմ ստեղծելու, ինչպես նաև ուկրաինական ձեռնարկությունների ունեցվածքի ապօրինի զավթման կասկածանքով։

Բացի այդ, Ուկրաինայի անվտանգության ծառայությունը Ամիրխանյանին կասկածել է սահմանադրական կարգի տապալումը ֆինանսավորելու մեջ։ 

Լուսանկարը՝ Ուկրաինայի անվտանգության ծառայության ֆեյսբուքյան էջից

2023-ի մարտին ուկրաինական on.od.ua լրատվամիջոցը, հղում անելով Օդեսայի շրջանային դատախազությանը, գրել է, որ Ամիրխանյանը կասկածվում է նաև առանձնապես խոշոր չափերի հարկերից խուսափելու մեջ։

Նոր պատժամիջոցներով Արայիկ Ամիրխանյանի ակտիվները, առևտրային գործառնությունները, Ուկրաինայից կապիտալի դուրսբերումը և ֆինանսատնտեսական այլ գործառնություններ 10 տարով սահմանափակվում են։

Հայաստանի իրավաբանական անձանց պետական ռեգիստրում Արայիկ Ամիրխանյանի մասնակցությամբ որևէ ընկերությունը չգտնվեց։

Գլխավոր լուսանկարը՝ nikvesti.com-ի