ԱՆ քրեակատարողական ծառայության կենտրոնական մարմնի օպերատիվ վարչության «Արմավիր» տարածքային բաժնի ծառայողները ստացել են օպերատիվ տեղեկություններ այն մասին, որ կալանավորված անձանցից մեկի մոտ կարճատև տեսակցության եկող քաղաքացին պետք է նրան փոխանցի թմրամիջոցով փաթեթ։ Այս մասին տեղեկացնում է Քրեակատարողական ծառայությունը։

«Իրացնելով ստացված տեղեկությունները՝ մարտի 12-ին՝ կարճատև տեսակցությունից անմիջապես հետո, ծառայողները կալանավորված անձ Գ․Գ․-ի մոտից հայտնաբերել են կպչուն ժապավենով փաթեթ, որում առկա են եղել հերոին տեսակի թմրամիջոցին նմանվող, 4,19 գրամ քաշով, շագանակագույն և թմրամիջոցի նմանվող, սև, 19,28 գրամ քաշով առանձնացված զանգվածներ։

Կալանավորված անձ Գ․Գ․-ն խոստովանել է, որ նշված փաթեթը կարճատև տեսակցության ընթացքում իրեն է փոխանցել քաղաքացուհի Ք․Գ․-ն։ Վերջինս ձերբակալվել է օպերատիվ ծառայողների կողմից և փաթեթի հետ միասին ներկայացվել ՔԿ Արմավիրի մարզային քննչական վարչության Վաղարշապատի քննչական բաժին»,- ասված է հաղորդագրության մեջ։