Հուլիսի 7-ին Մայր Աթոռ Սուրբ Էջմիածնի հովանու ներքո գործող Հայոց մարդասիրական ճեմարանի (Կալկաթա, Հնդկաստան) ռեգբիի թիմը Centenary ափսեի առաջնության եզրափակիչում տպավորիչ հաղթանակով հաղթեց «Մեյդան Հազարդ» թիմին:

Հունիսի 23-ին կիսաեզրափակիչում Մարդասիրականի տղաները 35-05 հաշվով հաղթել էին «Ֆրանկ Անտոնի» դպրոցի թիմին:

Ափսեի համար մղվող եզրափակիչ խաղը Մարդասիրական ճեմարանի և «Մեյդան Հազարդ» թիմերի միջև տեղի ունեցավ հուլիսի 7-ին: Խաղի ընթացքում երկու թիմն էլ իրեն լավագույնս դրսևորեց՝ ցուցադրելով ռեգբիի մեջ ունեցած իր հմտությունն ու վարպետությունը: Այնուամենայնիվ, մրցակից թիմը հարկադրված եղավ տեղի տալ Մարդասիրականի թիմին:

Հայոց մարդասիրական ճեմարանի թիմը 27-05 հաշվով նվաճեց Centenary ափսեն:

Հնդկահայոց հոգևոր հովիվ, Հայոց մարդասիրական ճեմարանի կառավարիչ Տեր Խորեն վարդապետ Հովհաննիսյանը փայլուն հաղթանակի համար շնորհավորեց թիմի մարզիչ Արմեն Ափելյանին և բոլոր խաղացողներին, օրհնեց իր սաներին՝ մաղթելով նորանոր նվաճումներ:

Մարդասիրականի ռեգբիի թիմն այս տարի ևս երկու կարևոր մրցաշարի պիտի մասնակցի՝ մի քանի շաբաթից սկսվող Կալկաթայի առաջնությանը, իսկ սեպտեմբերին՝ Հնդկաստանի առաջնությանը: