Դեկտեմբերի 23-ին Հայաստանի ֆուտբոլի ֆեդերացիան (ՀՖՖ) հերթական ժողովի ընթացքում ՀՖՖ նախագահի պաշտոնում վերընտրեց գործող նախագահ Արմեն Մելիքբեկյանին:

Մելիքբեկյանից բացի, ՀՖՖ նախագահի պաշտոնում առաջադրվել էր նաև Հայաստանի ազգային հավաքականի նախկին ֆուտբոլիստ Արաս Օզբիլիզը։

Փակ քվեարկության 23 մասնակիցներից 20-ը քվեարկել էին Մելիքբեկյանի, իսկ 3-ը՝ Օզբիլիզի օգտին։ ՀՖՖ 25 անդամներից 2-ը՝  «Նոա» և «Շիրակ» ֆուտբոլային ակումբները չէին ներկայացել ընտրությանը։

«Շարունակելու որոշումը միանգամից չի տրվել, արագ չի կայացվել: Իմ թիմը, ես մեր շահառուներից շատերի հետ ենք զրուցել, վերլուծել կատարված աշխատանքը, գնահատել ենք արածը և չարածը, ստացվածը և չստացվածը, որից հետո նաև գնահատել ենք, թե ինչ է հնարավոր անել ապագայում»,- ընտրություններից առաջ իր ելույթում նշեց Մելիքբեկյանը։

Արդյունքների ամփոփումից հետո Արմեն Մելիքբեկյանը անդրադարձավ 3 դեմ ձայներին՝ խոսելով երկու ակումբների հետ առկա կոնֆլիկտի մասին։

«Հայաստանի ֆուտբոլի ֆեդերացիան գալիք ամիսներին, տարիներին, օրերին մշտապես պատրաստ է լինելու համագործակցել բոլոր ակումբների հետ, պահպանել հավասարության սկզբունքները։ Ուղղակի մենք կցանկանայինք որոշակի քայլեր տեսնել նաև երկու ակումբների կողմից»,- նշեց ՀՖՖ նախագահը։

• «Փյունիկ» ֆուտբոլային ակումբի նախագահի ուղերձը ՀՖՖ գործող նախագահ Արմեն Մելիքբեկյանին

Մելիքբեկյանը նաև հույս հայտնեց, որ հնարավոր է լուծել բոլոր խնդիրները և շարունակել համագործակցությունը՝ հանուն հայկական ֆուտբոլի։

Մելիքբեկյանը կպաշտոնավարի մինչև 2026 թվականը: Նա ֆեդերացիայի նախագահի պաշտոնը զբաղեցնում էր 2019 թվականի դեկտեմբերից՝ այս պաշտոնում փոխարինելով ԱԱԾ նախկին տնօրեն Արթուր Վանեցյանին։