Հունիսի 27-ին՝ ժամ 11:00-ին, Երևանի քաղաքապետարանի առջև կանցկացվի բողոքի ակցիա՝ ընդդեմ Նանսենի այգում կատարվող կառուցապատման:

Նանսենի այգում դեռևս շարունակվում են կառուցապատման աշխատանքները, որոնց օրինական հիմքերը խիստ կասկածելի են. չեն անցկացվել հանրային լսումներ, իսկ քաղաքապետարանը բնակիչների բողոքներին պատասխանել է միայն մամուլի ասուլիսի ձևով, որում հիմնավոր տեղեկատվություն չի տրվել կատարվող աշխատանքների վերաբերյալ:

Հաշվի առնելով այս ամենը և մինչ այժմ կատարված հաջողված ու անհաջող փորձերը՝ հանրային տարածքներն իրենց նպատակային նշանակությանը համապատասխան օգտագործելու համար, Երևանի և մասնավորապես Նանսենի այգու շրջակա տարածքի բնակիչները նախաձեռնում են բողոքի ակցիա Երևանի քաղաքապետարանի մոտ:

Ակցիայի ժամանակ բնակիչները կպահանջեն, որ քաղաքապետն անձամբ պատասխանի իրենց հարցերին և չեղյալ համարի այն որոշումները, որոնք կայացրել է՝ առանց քաղաքացիներիս համաձայնության:

«Հորդորում ենք բոլոր շահագրգիռ կողմերին իրենց ֆիզիկական ներկայությամբ արտահայտել իրենց բողոքը և դրանով իսկ նպաստել մեր քաղաքի ևս մի հանրային ու կանաչապատ տարածքի պահպանմանն ու նպատակային նշանակությամբ օգտագործմանը»,- կոչ են անում բնակիչները: