Արարատի մարզի Շողափ գյուղի մոտակայքի խաչքարերը վտանգի տակ են: Ռեպորտաժ անելու նպատակով այնտեղ էր գնացել լուսանկարիչ Կարեն Մովսիսյանը, սակայն ընթացքում նկատել է, որ տեղի գերեզմանոցի տարածքում, որտեղ կան խաչքարեր և հնագույն քարեր, 5-6 հոգի երկու վրան են խփել, նրանց կողքը կանգած է մեքենա, և մարդիկ բահերով փորում են: Մի քանի օր շարունակ այդ աշխատանքները շարունակվում են:

Լուսանկարչին չի հաջողվել իմանալ, թե նրանք ովքեր են, սակայն դա կասկածի տեղիք է տալիս: Այդ լեռնային տարածքում միայն անասնապահներ են իրենց ընտանիքների հետ: Նրանցից մեկի վկայությամբ՝ անցած տարի ինչ-որ խումբ է եկել, քանդել և փորել են խաչքարերից մեկի տակը, ինչ-որ բաներ են տարել, ըստ երևույթին գանձեր են փնտրում, այնուհետև խաչքարը թողել են հողի մեջ և հեռացել: Կարենը չի մոտեցել այս աշխատող խմբին, քանի որ տեղացիներն ասում են, որ անցած տարի խաչքարերի մոտից նաև կրակոցներ են եղել: Այնուամենայնիվ, նրան հաջողվել է որոշ լուսանկարներ անել:

Կարենի խոսքերով` մարդիկ շատ վախեցած են աշխատում, իսկ գիշերները աշխատանքը շարունակում են լապտերներով: Պարբերաբար տարբեր մեքենաներ գնում-գալիս են:

Խաչքարերից որոշակի հեռավորության վրա գտնվում է Սուրբ Հովհաննես Կարապետ եկեղեցի, որը 13-րդ դարի կառույց է: Կարենի խոսքերով` այնտեղ կա շուրջ 10 խաչքար, սակայն մոտակայքի քարերը տարբեր դարերի կառույցների մնացորդներ են, հետաքրքիր քանդակներով են, ինչպես նաև արժեքավոր: 

Լուս.՝ Կարեն Մինասյանի