Գործադիրը փոփոխություններ ու լրացում է առաջարկում «Երեւան քաղաքում տեղական ինքնակառավարման մասին» օրենքում: Այս մասին հայտնում է ԱԺ հասարակայնության հետ կապերի և հաղորդակցության վարչությունը։

«Նոր կարգավորումներն ԱԺ մայիսի 23-ի նիստում ներկայացնելով՝ ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը տեղեկացրել է, որ Երեւանի քաղաքային իշխանությունների ընդունած իրավական ակտերն օրինագծի ընդունումից հետո կհրապարակվեն նաեւ arlis.am նորմատիվ իրավական ակտերի հրապարակման միասնական համակարգում: Նշվել է, որ շուրջ 6000 ակտ է ընդունվում, որոնք հրապարակվում են Երեւանի քաղաքապետարանի պաշտոնական կայքում:

Փոխնախարարի համոզմամբ օրինագծի ընդունման պարագայում դրանք համակարգված եւ որոշակի մեթոդաբանությամբ կհրապարակվեն arlis.am կայքում եւ հանրության, քաղաքացիների, նաեւ մասնագետների ու կազմակերպությունների համար կլինեն ավելի հասանելի ու դասակարգված:

Վաչե Տերտերյանը տեղեկացրել է, որ փորձարկումից հետո եթե պարզվի, որ գործընթացն արդյունավետ է իրականանում, ապա նման կարգավորումներ կառաջարկվեն նաեւ տեղական ինքնակառավարման մյուս մարմինների համար:

Տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի անդամ Մաթեւոս Ասատրյանը ներկայացրել է հանձնաժողովի դրական եզրակացությունը»,- ասված է հաղորդագրության մեջ: