Երեկ երեկոյան՝ ժամը 19:59-ին, Չարենցավանի ոստիկանական բաժանմունքից արտակարգ իրավիճակների նախարարությունում տեղեկություն է ստացվել, որ քաղաքի նախկին լեռնաշինարարական գործարանի մոտակայքում տեղի է ունեցել կիսաքանդ շինության փլուզում, և կա մեկ զոհ:

Դեպքի վայր է մեկնել մեկ մարտական հաշվարկ, մարզային փրկարարական ջոկատը, մարզային և ՃԿԿ օպերատիվ խմբերը, ինչպես նաև հատուկ փրկարարական ջոկատի հերթապահ խումբը:

Տեղում պարզվել է, որ փլուզվել է Չարենցավանի արտադրական թաղամասում տեղակայված կաթսայատան բետոնե ծխնելույզը:

Դժբախտ պատահարի հետևանքով փլատակներում մնացել և մահացել է Չարենցավանի 1ա թաղամասի 4-րդ շենքի թիվ 41 բնակարանի բնակիչ, 1989 թ. ծնված Հովհաննես Բաբայանը: Երեկոյան սկսված որոնողական աշխատանքները փրկարարները վերսկսել են այսօր առավոտյան ժամը 08.00-ին:

Դեպքի վայր են մեկնել նաև ԱԻ նախարար Արմեն Երիցյանը և ՓԾ տնօրեն, գեներալ-մայոր Սերգեյ Ազարյանը: Այս մասին հայտնում է Արտակարգ ալիք լրատվական կենտրոնը:

Լուսանկարը՝ Գագիկ Շամշյանի