ԱՄՆ կոնգրեսի Ներկայացուցիչների պալատի խոսնակ Նենսի Փելոսիի ամուսին Փոլ Փելոսին ապաքինվում է այն վնասվածքներից, որոնք ստացել է մուրճով իր տուն ներխուժած տղամարդուց։ Ինչպես հայտնում է BBC-ն, կասկածյալը ծայրահեղական հայացքներ ուներ և հավատում էր դավադրության տեսություններին, սակայն նրա դրդապատճառները դեռևս լիովին պարզ չեն։

ԱՄՆ խորհրդարանի ստորին պալատի խոսնակի 82-ամյա ամուսինը գանգուղեղային կոտրվածք և աջ ձեռքի վնասվածքներ է ստացել, սակայն ակնկալվում է, որ նա լիովին կապաքինվի։

Սան Ֆրանցիսկոյի ոստիկանությունը նոր մանրամասներ է հրապարակել Փելոսիների տանը տեղի ունեցածի մասին, որը գտնվում է Pacific Heights հեղինակավոր շրջանում: Ոստիկանության պետ Ուիլյամ Սքոթի խոսքով՝ կասկածյալը 42-ամյա Դեյվիդ Դեփեյփն է, որը շենք է ներխուժել հետևի դռնով՝ կոտրելով ապակին։

CNN-ը, հղում անելով իր աղբյուրներին, հայտնում է, որ տղամարդը բղավել է՝ «որտե՞ղ է Նենսին» և ժամանած ոստիկաններին ասել, որ «սպասում է Նենսիին»: Հարձակում գործած անձը փորձել է կապել Փոլ Փելոսիին, «մինչև Նենսին տուն հասնի», CBS NEWS-ին հայտնել են իրավապահ մարմինների աղբյուրները։

Հարձակման սկզբում Փոլ Փելոսին հարձակվողին ասել է, որ պետք է գնա զուգարան, ապա բջջային հեռախոսով գաղտնի զանգահարել 911 և զանգը միացրած է թողել։ Ծառայության հեռախոսավարը կռահել է, թե ինչ է կատարվում և արագ դեպքի վայր է ուղարկել ոստիկանությանը։ Ժամանած ոստիկանները հայտնաբերել են Փելոսիին և հարձակում գործած անձին, որոնք փորձում էին միմյանցից խլել մուրճը։ Արդյունքում, Դեփեյփը խլել է մուրճը և հարձակվել Փելոսիի վրա։

Դեփեյփին զինաթափել են և կալանավորել, որից հետո երկուսին էլ տեղափոխել են հիվանդանոց։ Կասկածյալը ևս հիվանդանոցում է, սակայն ոստիկանությունը հրաժարվել է մանրամասներ հայտնել նրա առողջական վիճակի մասին:

Սան Ֆրանցիսկոյի ոստիկանապետի խոսքով՝ Դեփեյփին մեղադրանք է առաջադրվելու զենքով սպանության փորձի, բնակարանային գողության և այլ քրեական մեղադրանքների համար։

Նենսի Փելոսին հարձակման պահին եղել է Վաշինգտոնում։

Լուսանկարը՝ DOUG MILLS / THE NEW YORK TIMES

Պատրաստեց Վաղինակ Ասատրյանը, ԵՊՀ ժուռնալիստիկայի ֆակուլտետի ուսանող