Աշտարակ-Էջմիածին ավտոճանապարհը՝ Սասունիկ գյուղի մոտակայքում, վերածվել է աղբանոցի: Մեկ տարուց ավել է՝ շինարարական աղբ է կուտակվում ճանապարհի երկայնքով: Քաղաքացիները, այն համարելով նոր աղբավայր, լցնում են նաև կենցաղային աղբ, պլաստիկե շշեր, պոլիէթիլենային տոպրակներ և այլն: 

Արագածոտնի մարզպետարանի քաղաքաշինության վարչության պետ Հակոբ Ստեփանյանը տեղյակ չէր, որ մարզպետարանից մոտ 4 կմ հեռավորության վրա նոր աղբավայր է գոյացել: Պաշտոնյան «Հետքի» հետ զրույցում ասաց, որ Սասունիկ գյուղի մոտ օրինական աղբավայր կա, սակայն առաջին անգամ է լսում, որ ճանապարհի մերձակա տարածքը վերածվել է աղբավայրի:

«Կպարզենք, տեղյակ չեմ»,- ասաց մարզպետարանի պաշտոնյան:

Վերահսկողության բացակայությունից օգտվելով՝ անհատները կամ կազմակերպությունները նույնիսկ ավտոմեքենայի ճանապարհ են հարթել՝ աղբավայր տանող: Շինարարական աղբը լցնում են ճանապարհից մոտ 20 մետր խորք՝ հողատարածքի մեջ: 

Մինչ պատկան մարմինները «կպարզեն», թե չնախատեսված վայրում ինչպես է նոր աղբավայր գոյացել, թափառող շները սնունդի մնացորդներով լցված պոլիէթիլենային տոպրակները քարշ են տալիս ճանապարհի կենտրոնական հատվածներով: