2022 թվականի սեպտեմբերի 22-ին ՄԱԿ-ի գլխավոր ասամբլեայի 77-րդ նստաշրջանը բարձրաստիճան հատվածում քննարկվեց ռուս-ուկրաինական պատերազմը։ Ներկայացնում ենք ԱՄՆ-ի, Ուկրաինայի և Ռուսաստանի ներկայացուցիչների ելույթների գլխավոր մտքերը։

ԱՄՆ նախագահ Ջո Բայդեն

«Եկեք անկեղծ լինենք։ ՄԱԿ-ի Անվտանգության Խորհրդի մշտական ​​անդամը ներխուժել է հարևան երկրի տարածք և փորձել քարտեզից ջնջել ինքնիշխան պետությունը։ 

Ռուսաստանն անամոթաբար խախտել է ՄԱԿ-ի Կանոնադրության այնպիսի հիմնական դրույթները, ինչպիսին է հարևան պետությունների տարածքների բռնազավթման հստակ ձևակերպված արգելքը։

Այսօր կրկին նախագահ Պուտինը բացահայտորեն սպառնում է Եվրոպային միջուկային պատերազմով,  ինչը համարվում է չտարածման ռեժիմի պարտավորությունների անխոհեմ արհամարհում:

Այժմ Ռուսաստանն իր շարքերն է հրավիրում նոր զինվորների՝ մասնակցելու այս ճակատամարտին։ Կրեմլը կեղծ հանրաքվեներ է կազմակերպում Ուկրաինայի մասերի միացման համար, ինչը նույնպես ՄԱԿ-ի Կանոնադրության կոպտագույն խախտում է։

Ողջ աշխարհը պետք է գիտակցի, թե ինչ են այս  գործողությունները։ Պուտինն ասում է, որ ստիպված էր գործել, քանի որ Ռուսաստանը հարձակման սպառնալիքի տակ էր:  Բայց Ռուսաստանին ոչ ոք չի սպառնացել և Ռուսաստանից բացի ոչ ոք կոնֆլիկտ չի փնտրել» - Բայդենի խոսքերն է փոխանցում Ռուսաստանում ԱՄՆ-ի դեսպանատան պաշտոնական էջը։ 

Ուկրաինայի նախագահ Վլադիմիր Զելենսկին իր ելույթում ասել է. «Ուկրաինան պատիժ է պահանջում մեր տարածքը գողանալու փորձի համար։ Պատիժ հազարավոր մարդկանց սպանելու համար։ Պատիժ կանանց և տղամարդկանց տանջանքների համար։  Պատիժ այն աղետալի խառնաշփոթի համար, որը Ռուսաստանը հրահրեց իր անօրինական պատերազմով, և ոչ միայն մեզ՝ ուկրաինացիներիս, այլ ամբողջ աշխարհի համար։  ՄԱԿ-ի Գլխավոր Ասամբլեայի այս դահլիճում ներկայացված յուրաքանչյուր ազգի համար»։

Ուկրաինայի ղեկավարը հայտարարել է, որ խոսում է պաշտպանվող երկրի անունից, բայց առաջարկել է խաղաղության իր բանաձևը։ 

«Ռուսաստանը պետք է զրկվի պատերազմի իրավունքից, պետք է զրկվի վետոյի իրավունքից, պետք է ստեղծվի միջազգային տրիբունալ և  միջազգային փոխհատուցման մեխանիզմ»։ 

Իր ելույթի վերջում նա հավելել է, որ Ռուսաստանը պատերազմ է ուզում, բայց չի կարող կասեցնել պատմության ընթացքը։ 

«Մարդկությունն ու միջազգային իրավունքն ավելի ուժեղ են, քան մեկ ահաբեկչական պետություն։ Ռուսաստանը պետք է կանգնեցնի պատերազմը։ Պատերազմ, որ հենց ինքն է սկսել», - նախագահի խոսքերն է փոխանցում  ՄԱԿ-ի պաշտոնական էջը։

ՌԴ ԱԳ նախարար Սերգեյ Լավրովը, ելույթ ունենալով ՄԱԿ-ի անվտանգության խորհրդի նիստում, 2014 թվականից Ուկրաինայում տեղի ունեցող իրադարձություններն անպատժելի է անվանել։

«Ինչպես հասկանում եմ, այսօրվա հանդիպումը պայմանավորված էր որոշ պատվիրակությունների՝ Ուկրաինայում անպատժելիության թեման քննարկելու ցանկությամբ։ Կարծում եմ, որ սա շատ ժամանակին է, քանի որ հենց այս տերմինը՝ անպատժելիությունն է արտացոլում այն, ինչ կատարվում է այս երկրում 2014 թվականից ի վեր»,- Ռուսաստանի Արտաքին գործերի նախարարի խոսքերն է փոխանցում «Ազատություն» ռադիոկայանը։ 

Լավրովն իր ելույթում մեղադրել է Ուկրաինային աջակցող արևմտյան երկրներին, որոնք մտադիր են հնարավորինս երկարաձգել ռազմական գործողությունները՝ չնայած զոհերին և ավերածություններին, որպեսզի «հյուծեն ու թուլացնեն Ռուսաստանը»։ Կոլեկտիվ Արևմուտքը ուկրաինական հակամարտության կողմն է կանգնել, ինչի մասին է վկայում Կիևին նրա օգնությունը, ներառյալ զենքի մատակարարումը, ավելացրել է սերջգեյ Լավրովը։

Բացի այդ, ՌԴ ԱԳՆ ղեկավարն անվստահություն է հայտնել Միջազգային Քրեական Դատարանին (ՄՔԴ)։

«Մենք ութ տարի սպասել ենք, թե երբ է Ուկրաինայում անպատժելիության դեմ պայքար սկսվելու։ Մենք այլևս հույսներս չենք դրել արդարության վրա։ Եկել է գործելու ժամանակը»,- հավելել է Սերգեյ Լավրովը։

Պատրաստեց Վաղինակ Ասատրյանը

ԵՊՀ Ժուռնալիստիկայի