Պաշտպանության նախարարությունն առաջարկում է 2022 թվականի հոկտեմբերի 24-ից մինչև 2023 թվականի հունվարի 31-ը հայտարարել ձմեռային զորակոչ։ Կառավարության այս որոշման նախագիծը շրջանառության մեջ է դրվել իրավական ակտերի նախագծերի հրապարակման միասնական կայքում։

2022 թվականի հոկտեմբերի 24-ից մինչև 2023 թվականի հունվարի 31-ը կանցկացվի արական սեռի այն քաղաքացիների շարքային կազմի պարտադիր զինվորական և այլընտրանքային ծառայությունների ձմեռային զորակոչը, որոնց 18 տարին լրանում է մինչև 2022 թվականի դեկտեմբերի 31-ը ներառյալ, ինչպես նաև այն քաղաքացիների, որոնց շարքային կազմի պարտադիր զինվորական ծառայության զորակոչից նախկինում տրված տարկետումը դադարում է մինչև 2022 թվականի դեկտեմբերի 31-ը ներառյալ:

Պաշտպանության նախարարության ներկայացրած նախագծի համաձայն՝ բուն ձմեռային զորակոչը կմեկնարկի 2023թ․ հունվարի 13-ին և կավարտվի 2023թ․ հունվարի 31-ին, իսկ զինծառայողների զորացրումը կմեկնարկի 2023-ի փետրվարի 8-ին և կավարտվի 2023-ի մարտի 31-ին։ Վերը նշված ավելի վաղ ժամկետները վերաբերում են ձմեռային զորակոչի նախապատրաստական աշխատանքենրին, որը կիրականացնի հանրապետական զորակոչային հանձնաժողովը։

Հավելենք, որ այս նախագիծն ուժի մեջ կմտնի միայն կառավարության հավանությանն արժանանալուց հետո։