ՀՀ քննչական կոմիտեում պարզվել են Երևանի 47-ամյա բնակչուհու սպանության դեպքի մի շարք հանգամանքներ: Այս մասին հաղորդում է կոմիտեի մամուլի ծառայությունը։

Հիշյալ դեպքի վերաբերյալ ահազանգը ստացվել է 2022 թվականի օգոստոսի 12-ին` ժամը 07:35-ին, որով տեղեկացվել է, որ Երևան քաղաքի Դավթաշեն 1-ին թաղամասի շենքերից մեկի հետնամասում գետնին ընկած կին կա՝ գլխի վնասվածքով:

Ըստ քննչական կոմիտեի հաղորդագրության՝ դեպքի առթիվ քրեական օրենսգրքի 155-րդ հոդվածի 1-ին մասով (սպանություն, խմբ․) նախաձեռնված քրեական վարույթի շրջանակներում կատարված դեպքի վայրի զննությամբ հայտնաբերվել է 47-ամյա կնոջ դին՝ մարմնական վնասվածքներով և գլխի հատվածում արնանման հետքերով: Նշանակվել է դիակի դատաբժշկական փորձաքննություն, որի նախնական եզրակացության համաձայն՝ մահվանը հանգեցնող ախտաբանական վիճակը մեխանիկական շնչահեղձությունն է:

Ձեռնարկված անհրաժեշտ միջոցառումների արդյունքում պարզվել է ենթադրյալ հանցագործությունը կատարած անձանց ինքնությունը, ովքեր Երևանի՝ 1981, 1982, 1987թթ.  ծնված բնակիչներ են: 

Վերջիններիս մեղադրանք է ներկայացվել՝ քրեական օրենսգրքի 155-րդ հոդվածի 2-րդ մասի 8-րդ կետով (սպանություն մի խումբ անձանց կողմից, խմբ): Նրանց նկատմամբ որպես խափանման միջոց է կիրառվել կալանավորումը:

Նախաքննությունը շարունակվում է: