Հայոց ցեղասպանության ճանաչումը, դատապարտումն ու հատուցումը այլընտրանք չունի: Այս մասին ֆեյսբուքյան իր էջում գրել է Արցախի պետական նախարար Արտակ Բեգլարյանը։

«Ժամանակակից Թուրքիան հրաժարվում է իր նախնիների իրականացրած ահասարսուռ ոճրագործության պատասխանատվությունից­՝ մոռանալով, որ հանցագործությունը վաղեմության ժամկետ չունի և ժխտումը ևս հանցագործություն է: Ավելին, Թուրքիան անվերապահորեն աջակցում է եղբայրական Ադրբեջանի ցեղասպանական քաղաքականությունը արցախահայության հանդեպ, որը, գաղափարական առումով, Հայոց ցեղասպանության շարունակությունն է:

Արցախը ևս միացել է Հայոց ցեղասպանության անմեղ զոհերի հիշատակի ոգեկոչմանը երեկ ու այսօր:

Թող ամբողջ աշխարհում ջահերի լույսը իսկապես լույս սփռի պատմական արդարության վերականգնման ճանապարհին:

Թող լույս իջնի բոլոր նրանց մտքերում, որոնք ժխտում և այդպիսով արդարացնում են ոճիրը…

Եվ թող լույսերի մեջ մնա սրբադասված նահատակների հիշատակը»,- գրել է նա: