Պաշտպանության նախարարությունն առաջարկում է 2022 թվականի ապրիլիս 18-ից մինչև 2022 թվականի հուլիսի 31-ը հայտարարել ամառային զորակոչ։ Կառավարության համապատասխան որոշման նախագիծը շրջանառության մեջ է դրվել իրավական ակտերի նախագծերի հրապարակման միասնական կայքում։

2022-ի ապրիլի 18-ից մինչև 2022-ի հուլիսի 31-ը կանցկացվի արական սեռի այն քաղաքացիների շարքային կազմի պարտադիր զինվորական և այլընտրանքային ծառայությունների ամառային զորակոչը, որոնց 18 տարին լրանում է մինչև 2022 թվականի հունիսի 30-ը ներառյալ, ինչպես նաև այն քաղաքացիների, որոնց շարքային կազմի պարտադիր զինվորական ծառայության զորակոչից նախկինում տրված տարկետումը դադարում է մինչև 2022 թվականի հունիսի 30-ը ներառյալ:

Բացի այդ, 2022 թվականի ամառային զորակոչի շրջանակներում մինչև 2022 թվականի օգոստոսի 30-ը ներառյալ կզորացրվեն օրենքով սահմանված ժամկետում շարքային կազմի պարտադիր զինվորական կամ այլընտրանքային զինվորական ծառայություն անցած զինծառայողները:

Պաշտպանության նախարարության ներկայացրած նախագծի համաձայն՝ բուն ամառային զորակոչը կմեկնարկի 2022թ․ հունիսի 13-ին և կավարտվի 2022թ․ հուլիսի 31-ին, իսկ զինծառայողների զորացրումը կմեկնարկի 2022-ի հուլիսի 1-ին և կավարտվի 2022-ի օգոստոսի 30-ին։ Վերը նշված ավելի վաղ ժամկետները վերաբերում են ամառային զորակոչի նախապատրաստական աշխատանքենրին, որը կիրականացնի հանրապետական զորակոչային հանձնաժողովը։

Հավելենք, որ այս նախագիծն ուժի մեջ կմտնի միայն կառավարության հավանությանն արժանանալուց հետո։