«Հայաստան» համահայկական հիմնադրամը հայ երգարվեստի գործիչներին հրավիրում է իրենց նոր երգերի տեսահոլովակներով մասնակցել Հեռուստամարաթոն 2011-ին:

Նպատակ ունենալով խթանել հայ երգարվեստը Հայաստանում, Արցախում եւ Սփյուռքում՝ Հիմնադրամը, ի թիվս իր հաշվետու, սոցիալական եւ գովազդային տեսահոլովակների, Հեռուստամարաթոն 2011- ի 12-ժամյա եթերի ընթացքում կհեռարձակվի մի շարք նոր երգերի տեսահոլովակներ:

«Հեռուստամարաթոնը կաբելային, արբանյակային հեռուստատեսությամբ, ինչպես նաեւ ինտերնետով դիտում են միլիոնավոր մարդիկ աշխարհի բոլոր մայրցամաքներում: Այս ձեռնարկը հնարավորություն կընձեռի հայ երգիչ-երգչուհիներին իրենց տեսահոլովակների առաջին ցուցադրությամբ լսելի ու տեսանելի դառնալ աշխարհի տարբեր անկյուններում»,-ասում է Հիմնադրամի գործադիր տնօրեն Արա Վարդանյանը:

Տեսահոլովակների ընտրությունը վերապահվում է հեռուստամարաթոնի կազմակերպման ստեղծագործական խմբին: Հայ երգարվեստի արդեն հայտնի անունների կողքին Հիմնադրամը ողջունում է նաեւ շնորհալի երիտասարդ երգիչ-երգչուհիների մասնակցությունը Հայաստանից, Արցախից եւ սփյուռքից, եթե նրանց կողմից ներկայացված տեսահոլովակները համապատասխանում են ստեղծագործական խմբի սահմանած չափանիշներին:

Հայտերի ներկայացման համար պարտադիր են հետեւյալ պայմանները.

•  Տեսահոլովակներ կարող են ներկայացնել Հայաստանի, Արցախի կամ սփյուռքի երգիչ-երգչուհիները,
• Կդիտարկվեն տարբեր լեզուներով եւ ամենատարբեր թեմաներով երգերը, սակայն նախապատվությունը կտրվի հայրենասիրության թեմաներով երգերին,
•  Տեսահոլովակի տեւողությունը չպետք է գերազանցի 4 րոպեն,
• Ներկայացվող տեսահոլովակները պետք է պատրաստված լինեն HD որակային չափանիշով,
• Յուրաքանչյուր մասնակից միայն մեկ տեսահոլովակ կարող է ներկայացնել,
• Տեսահոլովակները պետք է ներկայացվեն ոչ ուշ քան 2011թ. հոկտեմբերի 1-ը :
• Տեսահոլովակները պետք է ուղարկվեն [email protected] էլ. հասցեին: Էլ նամակի վերնագրում պետք է նշել «Հեռուստամարաթոնի տեսահոլովակ» բառերը, իսկ երգչի անունը, հասցեն եւ հեռախոսահամարը պետք է նշել հաղորդագրության մեջ:

Հիմնադրամը որեւէ նյութական մասնակցություն չի բերում տեսահոլովակների պատրաստմանը: