Մայիսի 15-ի վաղ առավոտյան  ժամը 5:30-ին  Վանաձոր-Ալավերդի  ճանապարհի 13-րդ կմ-ում  Ալավերդի քաղաքի բնակիչ  Արսեն Ժորայի Կիրակոսյանին պատկանող  «ԳԱԶ-3110» մակնիշի 65LU653  համարանիշի  ավտոմեքենան ընկել էր Փամբակ գետը: Դեպքից թեև անցել է 4 օր, սակայն վթարի հետևանքով գետում խեղդված 4 ուղևորներից  2-ի` Հարություն Շավարշի Երզնկյանի  և Վահան Վլադիմիրի  Երիցյանի  մարմինները դեռևս Դեբեդում  չեն հայտնաբերվել:  Որոնողական աշխատանքները իրականացնում է Լոռու մարզի փրկարարական ծառայությունը: 

Ծառայության պետի տեղակալ  Լևոն Դալլաքյանը այսօր «Հետքին» հայտնեց, որ որոնողական աշխատանքները շարունակվում են, սակայն Դեբեդի խիստ հորդառատ  վիճակը  դժվարեցնում են  դիակների հայտնաբերման  աշխատանքները: Հիշեցնենք, որ ավտովթարի հետևանքով զոհվածները աշխատում էին  «Վալլեքս» խմբի ընկերությունների մեջ մտնող «Բեյզ Մեթըլս» ընկերության՝ Ղարաբաղում գտնվող  Դրմբոնի հանքավայրում:  Որոնողական աշխատանքներին օժանդակելու հետ կապված մայիսի 18-ի երեկոյան «Հետքի» հարցմանը «Վալլեքս» խմբի ընկերությունների   տեղեկատվության և հասարակայնության հետ կապերի  բաժնից հայտնեցին, որ ընկերությունը նույնպես օժանդակում է  կատարվող  աշխատանքներին: Որոնողական աշխատանքներում  ներգրավված են  «Թեղուտ» ՓԲԸ-ի  20 աշխատողներ, ովքեր իրենց գործընկերների  դիակների որոնման աշխատանքներ են կատարում գետի ավելի հավանական տարածքներում: Այդ աշխատանքների համար  ընկերությունը տրամադրել է նաև  համապատասխան տեխնիկա:

Լուսանկարը՝ Գագիկ Շամշյանի