Արմավիրի մարզի Ֆերիկ գյուղն ամբողջությամբ եզդիաբնակ է։ Ցուցակով 352 ընտրող է գրանցված համայնքում, սակայն ժամը 15:00-ի դրությամբ քվեարկությանը մասնակցել է ընդամենը 57-ը։

Մանանե Հսոյանն ամուսնու հետ էր եկել քվեարկության։ Ամուսինը հրաժարվեց խոսել՝ պատճառաբանելով, թե իր «խելքի բանը չէ»։ Տիկին Մանանեն ասաց, որ քվեարկել է հույսով, որ նոր կառավարությունը խաղաղություն կբերի երկրին, այլևս պստերազմ չի լինի։

Հանձնաժողովի նախագահ Գայանե Գրիգորյանը «Հետքի» հետ զրույցում ասաց, որ հաշվի առնելով ընտրողների ընդհանուր թիվը` նորմալ է մասնակցության ցուցանիշը։

«Գյուղը փոքր է, ինչքան գիտեմ, փաստացի ավելի քիչ մարդ է ապրում»,- նշեց հանձնաժողովի նախագահը։ Գ. Գրիգորյանն ասաց, որ որևէ միջադեպ չի եղել, բողոքներ չկան։

Ֆերիկի համայնքապետ Ռուստամ Հասանյանը պարբերաբար պտտվում էր դպրոցի մոտակայքում, որտեղ տեղակայված է ընտրատեղամասը։ Մեզ հետ զրույցում ասաց, որ վերջին մի քանի ամիսների ընթացքում գյուղից 14 չափահաս մարդ է մեկնել արտագնա աշխատանքի։ Ըստ համայնքապետի` թեև ցուցակով Ֆերիկը 352 ընտրող ունի, սակայն փաստացի 124-ն են գյուղում բնակվում։

«Մեկ հոգին էլ սար է գնացել, գյուղում չի, որ մասնակցի ընտրությանը»,- հավելեց համայնքի ղեկավարը։

Ֆերիկում հանձնաժողովի անդամները ձանձրանում են ընտրողների բացակայությունից։