2011 թվականի դեկտեմբերի 28-ին «Մեկ ազգ» կազմակերպությունների դաշինքի Facebook-յան էջում հայտնվեցին զրպարտիչ և վիրավորական գրառումներ հանրային գործիչներ Դանիել Իոաննիսյանի, Բայանդուր Պողոսյանի և Հասմիկ Սիմոնյանի հասցեին:

Վերջիններս դիմեցինք դատարան՝ պահանջելով «Մեկ ազգ» կուսակցությունից հրապարակավ հերքել սուտ տեղեկությունները, ներողություն խնդրել վիրավորանքների համար և վճարել սիմվոլիկ փոխհատուցում՝ 10-ական դրամի չափով:

Այսօր՝ ապրիլի 16-ին՝ ժամը 14:15-ին, Աջափնյակ և Դավթաշեն վարչական շրջանների ընդհանուր իրավասության դատարանը քննելու է հանրային գործիչների՝ «Մեկ ազգ» կուսակցության դեմ ներկայացրած հայցը:

Նշենք նաև, որ պատասխանող կուսակցությունը չի ներկայացրել հայցադիմումի պատասխան, ինչը, համաձայն օրենքի, դատարանի կողմից կարող է համարվել որպես հայցային պահանջների ընդունում:

Հստակության համար նշենք, որ վեճը որևէ առնչույթուն չունի կրոնական կամ գաղափարափիլիսոփայական հարցերի հետ:

Տեղեկացնենք նաև, որ մի խումբ քաղաքացիներ, ի նշան բողոքի, ընդդեմ մեր հայցի և ի պաշտպանություն «Մեկ ազգ»-ի, ցույց են կազմակերպել դատարանի շենքի դիմաց:

Դանիել Իոաննիսյան
Բայանդուր Պողոսյան
Հասմիկ Սիմոնյան