Երևանի ընդհանուր իրավասության դատարանը՝ նախագահությամբ դատավոր Գագիկ  Պողոսյանի, այսօր բավարարել է Դատախազության դիմաց ապրիլի 22-ին տեղի ունեցած բողոքի ակցիայի առթիվ հարուցված գործով մեղադրյալ Հայկ Հեքիմյանին կալանավորելու միջնորդությունը։ Այս մասին «Հետք»-ի հետ զրույցում ասաց Հեքիմյանի պաշտպան Բենիկ Գալստյանը։

Նշենք, որ մի խումբ քաղաքացիներ ապրիլի 22-ին բողոքի ակցիա են իրականացրել Դատախազության շենքի դիմաց՝ պահանջելով ազատ արձակել Սյունիքի մարզում տեղի ունեցած բողոքի ակցիաների առթիվ հարուցված քրեական գործով ձերբակալված անձանց, և ակցիայի ընթացքում բախումներ են տեղի ունեցել դրա մասնակիցների և ոստիկանների միջև։

Քաղաքացիներից ոմանք ձվեր են նետել Դատախազության շենքի ուղղությամբ, ինչից հետո ոստիկանները սկսել են նրանց բերման ենթարկել։ Դեպքի առթիվ հարուցվել է քրեական գործ։

Հայկ Հեքիմյանը ապրիլի 23-ի երեկոյան՝ ջահերով երթի մեկնարկին, բերման է ենթարկվել, ձերբակալվել՝ Քրեական օրենսգրքի 316-րդ հոդվածի 1-ին մասով՝ իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելու կասկածանքով։ Պաշտպան Բենիկ Գալստյանը ձերբակալման որոշման դեմ բողոք է ներկայացրել, և Երևանի ընդհանուր իրավասության դատարանի դատավոր Ռոբերտ Պապոյանը, քննելով բողոքը, այն բավարարել ու Հեքիմյանին ազատ է արձակել։ Ապա վարույթն իրականացնող մարմինը Հեքիմյանին մեղադրանք է առաջադրել ու նրան կալանավորելու միջնորդություն ներկայացրել դատարան։

Հայկ Հեքիմյանի մեղադրանքի որոշման մեջ նշվում է, որ վերջինս մասնակցել է բողոքի ակցիային, որի ընթացքում ոստիկանության աշխատակիցների ուղղությամբ նետվել են ձվեր, շշեր, և Հայկ Հեքիմյանն, ի պատասխան ոստիկանության աշխատակից Կ․Ա․-ի կողմից հասարակական կարգը պահպանելու ուղղությամբ կատարված գործողությունների, մասնավորապես՝ ցույցը դադարեցնելու պահանջի, մի քանի անգամ ձեռքով հարվածել է ոստիկանի գլխին։ Մինչդեռ, Բենիկ Գալստյանի խոսքով, ցույցի տեսագրությունն ուսումնասիրելիս երևում է, որ Հայկ Հեքիմյանին հրմշտոցի ընթացքում, ամենայն հավանականությամբ՝ ոչ միտումնավոր, հետևի անձինք հրում են դեպի առաջ, և այդ ընթացքում Հայկը մոտենում է ենթադրյալ տուժող ոստիկան Կ․ Ա․-ին։ Երևում է, որ Կ․Ա․-ն ձեռքով մի քանի շարժում է անում, ու դիպչում Հայկի գլխին, քթին և մարմնի այլ  հատվածների։ Այսինքն՝ ըստ տեսանյութի, ոստիկանը հարվածում է քաղաքացուն, և վերջինս հարվածում է ոստիկանին։

Բենիկ Գալստյանը մեզ հետ զրույցում նշել է, որ իր տեղեկություններով՝ Հեքիմյանի կալանավորման միջնորդությունն ի սկզբանե մակագրվել է դատավոր Տաթևիկ Գրիգորյանին, ապա իր համար անհայտ պատճառներով մակագրվել դատավոր Պողոսյանին։ Դատարանի աշխատակազմից, սակայն, պաշտպանին հայտնել են, որ ի սկզբանե գործը Պողոսյանին է մակագրված եղել, և, ամենայն հավանականությամբ Տաթևիկ Գրիգորյանին գործը մակագրելու վերաբերյալ տեղեկությունը թյուրիմացության հետևանք է։

Լուսանկարում՝ Բենիկ Գալստյանը