Լեռնային Ղարաբաղում տեղակայված ռուսական խաղաղապահ զորախմբի կազմում գործող կողմերի հաշտեցման կենտրոնը ստուգում է Հադրութի շրջանի Տող գյուղի մոտակայքում հայ-ադրբեջանական փոխհրաձգության մասին տեղեկությունները։ Այս մասին ասվում է Ռուսաստանի պաշտպանության նախարարության հրապարակած տեղեկագրում։

Հիշեցնենք, որ Ադրբեջանի պաշտպանության նախարարությունը տեղեկություն էր տարածել, թե հայկական 6 հոգանոց զինված խումբը դեկտեմբերի 27-ին՝ 15։30-ի սահմաններում, հարձակում է գործելՀադրութի շրջանի Տող գյուղի մոտակայքում Ադրբեջանի զինված ուժերի ստորաբաժանումների վրա։ Ըստ ադրբեջանական կողմի՝ փոխհրաձգության հետևանքով զոհվել է մեկ ադրբեջանցի զինծառայող, ևս մեկը՝ վիրավորվել, իսկ հայկական 6 հոգանոց խումբն ամբողջությամբ վնասազերվծել է։

Հայաստանի պաշտպանության նախարարությունը հերքեց Ադրբեջանի պաշտպանական գերատեսչության տարածած տեղեկությունները՝ նշելով, որ Արցախի Պաշտպանության բանակը խստորեն պահպանում է հրադադարի ռեժիմը, որևէ ստորաբաժանում տվյալ հատվածում որևէ գործողության չի մասնակցել, ավելին՝ ՊԲ ստորաբաժանումների հետ կապված որևէ արտակարգ միջադեպ չի գրանցվել, իսկ Տող գյուղը գտնվում է ադրբեջանական զինված ուժերի ամբողջական վերահսկողության ներքո։

Եվ ահա այսօր հայտնի դարձավ, որ ռուսական խաղաղապահ զորախումբը ստուգում է Տող գյուղի շրջանում հավանական զինված բախումների մասին ստացված տեղեկությունները։

ՌԴ պաշտպանության նախարարության տեղեկագրում ասվում է նաև, որ հայկական կողմը վերադարձրել է ադրբեջանցի երկու գերիների։ Միևնույն ժամանակ Հայաստանի փոխվարչապետ Տիգրան Ավինայնը ավելի վաղ հայտնել էր, որ Ռուսաստանի Դաշնության և Կարմիր խաչի միջազգային կոմիտեի միջնորդությամբ այսօր 4 հայ գերիներ վերադարձել են Հայաստան:

Հիշեցնենք, որ դեկտեմբերի 4-ին Ադրբեջանը հայկական կողմին վերադարձրեց 2 քաղաքացիական անձի, ևս 3-ը վերադարձվեցին դեկտեմբերի 9-ին։ Նույն օրը ադրբեջանական կողմը Հայաստանին փոխանցեց նաև մեկ տղամարդու դի։

Ամենամեծ թվով գերիները Հայաստան վերադարձվեցին դեկտեմբերի 14-ին։ Այդ օրը Ադրբեջանից Հայաստան են տեղափոխվել 44 գերիներ և պահվող այլ անձինք, իսկ հակառակ ուղղությամբ՝ 12։ Դեկտեմբերի 28-ին ևս 4 հայ գերիներ վերադարձվեցին հայրենիք։

Ըստ դեկտեմբերի 28-ին հրապարակված տեղեկագրի՝ Լեռնային Ղարաբաղում գործում է ռուս խաղաղապահների 23 դիտակետ, որտեղ նրանք իրականացնում են հրադադարի ռեժիմի պահպանման մոնիտորինգ։ Նոյեմբերի 14-ից սկսած Արցախ է վերադարձել ընդհանուր 45 923 քաղաքացի, որոնք ժամանակավորապես ապաստանել էին Հայաստանի Հանրապետությունում։ 

Ռուս խաղաղապահները նոյեմբերի 23-ից սկսած Արցախում ականազերծել են ընդհանուր 320 հեկտար տարածք, 122,7 կմ ճանապարհներ և 505 բնակելի շինություն, այդ թվում՝ 15 սոցիալական նշանակության օբյեկտ։ Հայտնաբերվել և ոչնչացվել է 12 459 պայթյունավտանգ առարկա։