Երեկ ոստիկանությունը հրապարակեց այդ պահի դրությամբ Հայաստանում ընտրելու իրավունք ունեցող ՀՀ քաղաքացիների թիվը, որը կազմում է 2 միլիոն 485 հազար 844 մարդ: Երևան քաղաքի ընտրողների թիվը 860 հազար 388 մարդ է: Մինչդեռ տարեսկզբին Ազգային վիճակագրական ծառայության հրապարակած մարդահամարի տվյալներով՝ Հայաստանում բնակչության թիվը 2 միլիոն 870 հազար է:

Նշենք, որ վերջին՝2008թ. նախագահական ընտրությունների ժամանակ ընտրողների թիվը եղել է 2 մլն 311 հազար 917 մարդ: Ընդդիմադիր քաղաքական գործիչները կարծում են, որ այս «հանելուկը» պարարտ հող է ստեղծում մայիսի 6-ի խորհրդարանական ընտրությունները կեղծելու համար:

ՀՅԴ խմբակցության պատգամավոր Լիլիթ Գալստյանը «Հետքի» հետ զրույցում ասաց, թե ընտրողների հրապարակված թիվը խորը մտահոգության, ավելին՝անհանգստության տեղիք է տալիս: Ըստ պատգամավորի՝պետք չէ զինված լինել քաղաքագիտական գիտելիքներով, ոչ էլ փորձառությամբ՝ հասկանալու համար, որ Հայաստանում ամեն տարի արտագաղթողների թիվը պաշտոնական տվյալներով 30-40 հազար մարդ է, ծնելիությունը նվազել է, և երկրում կա լուրջ ժողովրդագրական խնդիր: Ուստի, հնարավոր չէ, որ այս ֆոնին ընտրողների թիվը աճեր:

«Մարդահամարի վերջին տվյալներով արձանագրվեց բնակչության թվի նվազում, մյուս կողմից էլ համեմատում ենք վերջին ընտրությունների ընտրողների թիվը, ու մեկ էլ հրապարակվում են տվյալներ, որ ընտրողների թիվը գրեթե հավասար է բնակչության ընդհանուր թվին: Կարելի էր ծիծաղել, եթե ողբերգական չլիներ: Որպես ՀՀ քաղաքացի և քաղաքական գործիչ՝ շատ պիտի ուրախանայի, որ եթե այդքան ընտրող ունենք, նշանակում է բնակչության աճ ենք ունեցել, բայց սա խոսում է միայն նախընտրական կեղծիքի սցենարի մասին: Արհեստականորեն ընտրողների թվաքանակն ավելացված է շատ պարզ, հասկանալի հեռանկարով»,- ավելացրեց Լիլիթ Գալստյանը:

Պատգամավորի կարծիքով՝այս երևույթը պետք է մտահոգի ոչ միայն ընդդիմադիրներին, այլև բոլորիս, որովհետև ցանկացած ընտրակեղծիք հարվածում է Հայաստանի ապագային և պետականությանը, իսկ այս դեպքում կարծես թե բախվում ենք զանգվածային ընտրակեղծիքի հետ:

«ՀՅԴ-ի քաղաքական որոշումները կայացում է Գերագույն մարմինը, բայց իմ կարծիքով՝պետք է քննարկել և հասկանալ, թե ինչ կարելի է անել, քանի որ նորից բախվում ենք ամեն գնով իշխանությունը պահելու վարքագծի հետ: Սա լուրջ թեմա է, և ընդդիմադիր դաշտը ոչ միայն պետք է հետևություններ անի, այլև համապատասխան վարքագիծ դրսևորի: Չի կարելի թողնել, որ գողանան ընտրության մեր իրավունքը, մեր արժանապատվությունը, քանի որ կեղծում են Հայաստանի վաղը»,- ասաց Լիլիթ Գալստյանը:

«Ժառանգություն» խմբակցության պատգամավոր, Երևան թիվ 6 ընտրատարածքում առաջադրված պատգամավորության մեծամասնական թեկնածու Արմեն Մարտիրոսյանը նույնպես մտահոգություն հայտնեց ընտրողների թվի վերաբերյալ:

«Արդեն աբսուրդի վարպետ Կաֆկայի ժամանակներում ենք ապրում: Իշխանությունները հայտարարում են արտագաղթի մասին, նույնիսկ այդ պարագայում իրենց մոտ չգիտես ինչ հրաշքով ընտրողների թիվը ավելանում է: Սովորողների թիվը տարեցտարի պակասում է, բայց Հայաստանում միայն ընտրողների թիվն է ավելանում»,- ասում է Արմեն Մարտիրոսյանը:

Ըստ պատգամավորի՝պարզագույն հաշվարկները ցույց են տալիս, որ երկրի բնակչության 25-30 տոկոսն ընտրական իրավունք չունեցող է՝մինչև 18 տարեկան անձինք: Արմեն Մարտիրոսյանի հաշվարկով, եթե Հայաստանի բնակչությունը մոտավորապես 2.8 մլն է, և նրանց 25 տոկոսն էլ կազմում է 700 հազար մարդ, ապա ընտրողների թիվն իրականում պետք է լիներ 2 մլն 100 հազար մարդ, ոչ թե 2.5 միլիոն, որը հրապարակել է ոստիկանությունը:

Ինչ վերաբերում է թիվ 6 ընտրատարածքին, ապա 2 օրվա տարբերությամբ Արմեն Մարտիրոսյանը զարմանքով արձանագրել է, որ 3000 ընտրող միանգամից ավելացել է: «Սա նաև մեծամասնականի համար է օգտագործվելու, և որպես ընդդիմադիր թեկնածու՝ ինձ համար խնդրահարույց վիճակ է ստեղծում»,- ավելացրեց նա:

Պատգամավորը վստահված անձանց և հանձնաժողովների անդամներին կոչ է անում ուշադիր լինել անձնագրերի հարցում՝ ընտրակեղծիքների դեմն առնելու համար: