Վերաքննիչ քրեական դատարանում, նախագահությամբ դատավոր Նարինե Հովակիմյանի, քիչ առաջ սկսվեց Սահմանադրական դատարանի նախագահ Հրայր Թովմասյանի սանիկ Նորայր Փանոսյանին կալանավորելու որոշման դեմ նրա պաշտպանների բողոքի քննությունը: Նորայր Փանոսյանը բերվել է դատարան ու մասնակցում է բողոքի քննությանը, նիստը դռնփակ է:

Հիշեցնենք, որ Փանոսյանը կալանավորվել է հունվարի 9-ին Երևանի ընդհանուր իրավասության դատարանի դատավոր Գագիկ Պողոսյանի որոշմամբ:

Նշենք, որ Փանոսյանը 2019-ի սեպտեմբերի 28-ին ձերբակալվել էր, ապա Քննչական կոմիտեն նրան մեղադրանք էր առաջադրել և միջնորդություն ներկայացրել դատարան՝ նրա նկատմամբ կալանավորումը որպես խափանման միջոց ընտրելու վերաբերյալ:

Ըստ տարածած հաղորդագրության՝ տվյալներ են ձեռք բերվել Հրայր Թովմասյանի արդարադատության նախարար եղած ժամանակահատվածում Նորայր Փանոսյանի, Արդարադատության նախարարության ու Երևանի քաղաքապետարանի այլ պաշտոնատար անձանց կողմից իրենց պաշտոնեական լիազորությունները չարաշահելու դեպքերի վերաբերյալ: Այս որոշման դեմ բողոք էր տարվել Վերաքննիչ դատարան, և 2019-ի նոյեմբերի 6-ին դատարանը՝ նախագահությամբ դատավոր Սերգեյ Մարաբյանի, որոշել էր  կալանքից ազատել Փանոսյանին: Դատարանն արձանագրել էր, որ առկա չէ հիմնավոր կասկած առ այն, որ Նորայր Փանոսյանը կատարել է իրեն վերագրվող արարքը:

2019-ի դեկտեմբերի 26-ին Փանոսյանի մեղադրանքը փոփոխվել էր, և նրան նոր մեղադրանք էր առաջադրվել Քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևաննքներ), ապա նորից Փանոսյանին կալանավորելու միջնորդություն ներկայացվել դատարան, որը կրկին բավարարվել է:

Լուսանկարը՝ forrights.am-ից