«Հետքի» հարցերին պատասխանել է ՀՀԿ խմբակցության ԱԺ պատգամավոր, «Հզոր հայրենիք» կուսակցության փոխնախագահ, «Ջավախք» հայրենակցական միության նախագահ Շիրակ Թորոսյանը 

Պրն Թորոսյան, ապագա խորհրդարանում Դուք լինելո՞ւ եք, թե՞ ոչ: 

Դժվար հարց էր, բայց ինձ թվում է` հա: Բայց քանի դեռ համամասնական ցուցակ չկա, բարդ է ասել: Սպասում ենք համամասնական ցուցակին: 

Ի՞նչ եք կարծում` Ձեզնից բացի Ջավախքը ներկայացնող այլ պատգամավորներ կլինե՞ն, մասնավորապես «Հզոր հայրենիք» կուսակցությունից Ձեզնից բացի այլ առաջադրվողներ կլինե՞ն: 

Դժվարանում եմ ասել: Ցանկալի է, որ «Հզոր հայրենիքից», «Ջավախք» հայրենակցական միությունից էլի լինեն Ջավախքը ներկայացնող պատգամավորներ, իսկ մինչ այդ ես որքան գիտեմ` մենակ ես եմ Ջավախքը ներկայացրել: 

Իսկ «Վիրահայերի միասնությո՞ւնը»: 

Ես գնահատում եմ ընդհանուր գործունեությունն ու աշխատանքը, և մենակ ես չեմ գնահատում, դա հասարակության գնահատականն է: Դուք էլ եք վստահ երևի, որ Ջավախքը մենակ ես եմ ներկայացրել: 

Եթե ՀՀԿ-ի համամասնական ցուցակում չլինեք, հնարավո՞ր է, որ այլ քաղաքակամ ուժի միանաք: 

Ոչ «Հզոր հայրենիք» կուսակցությունը և ոչ էլ «Ջավախք» հայրենակցական միությունը դեռ որոշում չեն կայացրել: Երբ որ կայացնենք, երբ որ պարզ կլինի,  հանրությանը հայտնի կդառնա, թաքուն չենք կարող պահել: 

Բոլոր հարցերը քննարկվում են և' կուսակցությունում, և' հայրենակցական միությունում. ով է լինելու, ուր ենք գնալու, ում հետ ենք գնալու, ինչու ենք գնալու: Երբ որ այդ ամենի լուծումներն երևան, մենք արդեն կհայտնենք: 

Ե՞րբ լուծումները կերևան: 

Յոթ սարի հետևում չէ, գիտենք, որ նախընտրական գործընթացները սկսվում են, շուտով այդ ամենը հայտնի կդառնա: 

«Հզոր հայրենիքը» համագումար ո՞ւնի այս տարի, և ընդհանրապես անո՞ւմ է: 

Իհարկե, կանոնադրությամբ և օրենքով սահմանված երկու տարին մեկ համագումար է արել, հիմա այս տարի համագումար չունենք, բայց հավանաբար արտահերթ կլինի` քաղաքական կողմնորոշում արտահայտելու, դա ցույց կտա ժամանակը: Կամ համագումար կլինի, կամ ղեկավար մարմնի հայտարարություն: