Այս տարվա սեպտեմբերին տեղական ինքնակառավարման համակարգի ներդրման 15-ամյակի միջոցառումների շրջանակում Վանաձորում եւ Գյումրիում անցկացվել է միջհամայնքային մշակութային ցուցահանդես եւ մրցույթ-փառատոն: Հայտարարվել է մրցույթ 14 անվանակարգերում: Սակայն մինչ օրս փառատունում հաղթող հաստատությունների կամ անհատների մեծ մասը չի ստացել խոստացված պարգեւը: Ավելին, փառատոնի սկզբում բոլոր համայքներն ու մշակույթի հաստատությունները ստացել են կանոնադրությունը եւ պայմանները, որտեղ գրված է եղել նաեւ մրցանակային գումարի չափերը: Օրինակ` լավագույն գրադարանի համար 1 մլն դրամ, լավագույն մշակութի տունը` 1 մլն դրամ, լավագույն թատերական խումբը` 2 մլն դրամ եւ այլն:

Մինչդեռ փառատոնում հաղթած մասնակիցներից մի քանիսը, որոնց արդեն գումարը փոխանցվել է, նախօրոք հայտարարվածից ավելի քիչ են ստացել` 300 հազար դրամ:

Ալավերդու դրամատիկական թատրոնը հաղթել է «Լավագույն թատերական խումբ» անվանակարգում` արժանանալով առաջին մրցանակին: Թատրոնի ռեժիսոր Հրաչյա Պապինյանն ասում է, որ թատրոնը պետք է 2 մլն դրամ ստանար: Նախատեսել էին, որ այդ գումարով անհրաժեշտ սարքավորումներ կառնեն, եւ խումբը Ղարաբաղ կգնա հյուրախաղերի, սակայն այժմ հույս չունեն, որ կստանան նույնիսկ այդ 300 հազար դրամը: «Էդ մրցանակները 7 գաղտնիքի տակ են, այդպես էլ չենք հասկանում` տալո՞ւ են, չե՞ն տալու, ե՞րբ են տալու, ոչ մեկը չի կարողանում ասել: Զանգում եմ Ալավերդու քաղաքապետարանի մշակույթի բաժին, տեղյակ չեն, մարզպետարանի մշակույթի բաժինը տեղյակ չի, չենք կարողանում ճշտել»,- ասում է Հ. Պապինյանը:

Նա նաեւ նշում է, որ դերասաններին էլ թվում է, թե այդ գումարները ռեժիսորն ինչ-որ ճանապարհով ստացել է, բայց չի ասում այդ մասին: Նրանք ամեն օր զանգում ու հետաքրքրվում են, թե ինչ տեղեկություններ կան սպասված մրցանակից: Մասնակիցները հույս են ունեցել, որ նոյեմբերի 10-ի միջոցառմանը բոլորին կհրավիրեն եւ կհանձնեն մրցանակները, սակայն չեն հրավիրել:

Մրցույթին նախապատրաստվելու համար Ալավերդու դրամատիկական թատրոնը բավականին ծախսեր է կատարել: «Մենք մենակ մի գրուզավիկ էինք վարձել` դեկորացիան տանելու, ավտոբուս էինք վարձել` դերասաններին տանելու, օրապահիկ էինք տվել, նոր հատուկ բեմադրություն էինք արել, զգեստ էինք պատվիրել»,- ասում է ռեժիսորը:  Բայց Հ. Պապինյանն այնքան ֆինանսական կողմը չի կարեւորում, որքան բարոյականը. «Երբ փառատոնը եղավ, ասացինք` վերջապես 20 տարվա մեջ մշակույթի նախարարության կամ տարածքային իշխանությունների կողմից ուշադրություն է դարձվում»:

Ստեփանավանի քաղաքային գրադարանը հաղթողների ցուցակում է: Գրադարանի տնօերն Էլմիրա Քեղինյանն ասում է, որ մրցույթին հավուր պատշաճի են պատրաստվել` յուրահատուկ տաղավար կազմել եւ ձեւավորել, գրքույկներ տպագրել, այլ կերպ ասած` լուրջ են մոտեցել: Դրա համար մեծ ծախսեր են պահանջվել: Ցուցադրությանը պատրաստվելու, ինչպես նաեւ ճանապարհածախսը հոգալու համար ավելի քան 500 հազար դրամ է ծախսվել: Էմիլիա Քեղինյանը, սակայն, նույնպես տեղյակ չէր, թե ինչու է խոստացված 1 մլն դրամից մրցանակի գումարը նվազել` դառնալով 300 հազար դրամ: Միայն ասել են, որ իրենց կփոխանցվի 300 հազար դրամ: «Ոչ մի բանից տեղյակ չենք, պատկերացրեք, որ չկարողացանք ոչ մեկից իմանալ: Մնացած նոմինատներից էլ եմ հետաքրքրվել, ոչ մեկն էլ կարծես թե գաղափար չունի»,- ասում է տնօրենը:

Լոռու մարզպետարանի աշխատակազմի կրթության, մշակույթի եւ սպորտի վարչության Մշակույթի եւ սպորտի բաժնի պետ Արամ Ռեւազյանը նույնպես տեղյակ չէր, թե ինչու գումարները չեն տրամադրել, ինչու են նվազեցվել գումարները: Արամ Ռեւազյանը հայտնեց, որ գումարային մրցանակներ Լոռու մարզից դեռեւս ստացել են միայն Ստեփանավանի մշակույթի տունն ու քաղաքային գրադարանը, թեեւ ամենաշատ անվանակարգեր իրենց մարզն է ստացել: 

«Հետքի» ընթերցողների մեկը մրցույթ-փառատոնի առիթով նույնպես մտահոգություն է հայտնել կայքի մեկնաբանությունների դաշտում` նշելով, որ մրցույթ-փառատոնն անցկացվել է սարսափելի անկազմակերպ. «...Ներեցեք ինձ եթե «բարդակ» ասեմ այդ ամենին. լրիվ դատարկ դահլիճներ, խմբերը ժամանում էին նշված վայր, ոչ մեկը տեղյակ չի, ոչ ոք չգիտի` ով է պատասխանատուն:...Ո՞ւր է գնացել նրանցից գողացված գումարները, այն դեպքում երբ բոլոր նշված այդ կոլեկտիվները ավելին են ծախսել մասնակցելու համար, քան այդ ասված ու դեռ տարօրինակ ստվերիային գործողություններ կատարվող 300 000 դրամը: Ո՞ւր կորան փողերը: Ո՞ւմ էր պետք էդ փառատոնը, եթե հանդիսավոր հայտարարում են` էսպես ու էնեպես ու հետո փողերը կրճատ անում, չէին կարողանում չանեին, ո՞վ էր խնդրում»:

Միջհամայնքային մշակութային ցուցահանդեսի եւ փառատոնի կազմակերպիչները ՀՀ  տարածքային կառավարման եւ մշակույթի նախարարություններն են: Տարածքային կառավարման նախարարությունն իրականացրել է միջոցառման կազմակերպչական  եւ տեխնիկական աջակցությունը: Ֆինանսական կարգադրիչը մշակույթի նախարարությունն է` ի դեմս «Հայաստանի պետական ֆիլհարմոնիա» ՊՈԱԿ-ի: Նշյալ ՊՈԱԿ-ի տնօրեն Գագիկ Մանասյանը հաստատեց, որ նախնական կանոնադրության մեջ գրված մրցանակներն իսկապես ավելին էին, սակայն հետո բազմաթիվ քննարկումներ են եղել, եւ մայիսին որոշվել է այդ մրցանակները բաշխել 2 կամ 3 մասնակիցների միջեւ, որպեսզի շատ մարդիկ կարողանան դրանց տեր դառնալ, ընդ որում, ըստ Գ. Մանասյանի, դա հենց մասնակիցների առաջարկությունն է եղել:  «Վստահ եղեք, որ իրենք տեղեկացված են: Ես բոլոր մարզերում ժողովների եմ մասնակցել, բացատրել եմ` ինչ պիտի լինի, ոնց պիտի լինի եւ այլն: Ով որ չի տեղեկացվել, ուրեմն ինքը հիմք ընդունում է էդ նախնական խոսակցությունները»,- արդարացավ Գ. Մանասյանը:

Վերջինս վստահեցնում է, որ մրցանակները մինչեւ դեկտեմբերի 1-ը կհանձնվեն, քանի որ մինչ այդ պատրաստվում են մեդալները, գովասանագրերը, պատվոգրերը եւ այլն: Հաղթողները կհրավիրվեն տարածքային կառավարման նախարարություն եւ որեւէ արարողություն կլինի: «Թյուրիմացությունն առաջացել է նրանից, որ նոյեմբերի 10-ին համայնքների խորհուրդն էր, մարդիկ մտածում էին, որ այդ օրը պիտի ստանան, բայց դրա հետ կապ չունի մրցույթը»: Մրցանակները կբաշխվեն հետեւյալ կերպ. կոլեկտիվ խմբերը կստանան 500 հազար դրամ, անհատ գործիչները` 250 կամ 300 հազար դրամ: Ըստ Գ. Մանասյանի` ովքեր «Էքսպո» ցուցահանդեսին մասնակցել են տաղավարներով, նրանց մրցանակներն արդեն տրվել են, ովքեր գործունեությամբ են մասնակցել, նրանցը չի տրվել, որովհետեւ պատվոգրերը, մեդալները պատրաստ չեն եղել:

Գ. Մանասյանը նշեց, որ մրցույթ-փառատոնի մրցանակային ֆոնդը 12 մլն դրամ է կազմում: Սակայն ՏԿՆ հասարակայնության հետ կապերի բաժինը, պատասխանելով մեր հարցերին, տեղեկացրել է, որ ՏԻՄ 15-ամյակի հոբելյանական միջոցառումների անցկացման նպատակով հովանավորներից ստացված միջոցներից «Հայաստանի համայնքների միություն» իրավաբանական անձանց միությունը տրամադրել է 15 մլն դրամ, որից 11,1 մլն դրամը` կազմակերպչական ծախսերի, 3,9 մլն դրամը` մրցանակային ֆոնդի համար: Քանի որ ֆինանսական կարգադրիչը մշակույթի նախարարությունն է, միջոցառման մրցանակային ֆոնդի եւ կազմակերպչական ծախսերի մասին հարցեր ուղղեցինք մշակույթի նախարարությանը, սակայն դեռեւս պատասխան չենք ստացել: