Վերահսկիչ պալատը ՀՀ կառավարությանն առընթեր անշարժ գույքի կադաստրի պետական կոմիտեին պետական բյուջեից հատկացված միջոցների օգտագործման վերահսկողության ընթացքում ուսումնասիրել է 7 ստորաբաժանում` Գյումրիում, Դիլիջանում, Իջևանում, Չարենցավանում, Եղեգնաձորում, Ալավերդիում և Վեդիում: Արդյունքում շուրջ 14 մլն դրամի խախտման դեպք է գրացնվել: Ընդ որում` սա ՎՊ-ի առաջին ստուգումն է եղել: Պարզվել է, որ համայնքները տալիս են տեղեկանքներ մի տեսակի շինության համար, սակայն այդ շինությունը ծառայում է այլ նպատակների համար:  Վերահսկիչ պալատի նախագահ Իշխան Զաքարյանը այստեղ լուրջ կոռուպցիոն ռիսկեր է տեսնում, քանի որ համայնքների տարածքում կառուցված ինքնակամ շինությունների նպատակային նշանակությունը սխալ է դասակարգվում: Հասարակական նշանակության շինությունները որակվել են որպես արտադրական շենք կամ որպես բնակելի տուն: Իսկ հասարակական և արտադրական շինությունների տարբերություններն այն է, որ հասարակական շինությունն ավելի մեծ գույքահարկ է վճարում` մոտ 4 անգամ ավել: Նմանատիպ 11 դեպք գրացնվել է Գյումրիի կադաստրում, 2-ը` Դիլիջանում: «Ով պետք է վճարի այս գումարը: Առաջին հայացքից վիճարկելի խնդիր է, որովհետև տեղեկանքը տալիս է համայնքը, ինքը պետք է շահագրգռված լինի այս գումարները հավաքելու և բյուջե մուտքագրելու գործում, կադաստրն ընդամենը գրանցող մարմին է: Բայց ես հակված չեմ այն մտքին, որ կադաստրի ստորաբաժանումների աշխատողները մաքուր և հրեշտակի թևերով մարդիկ են: Այստեղ լուրջ կոռուպցիոն ռիսկերը տեսնում ենք, բայց օրենսդրական դաշտում պատասխանատունները համայնքներն են, և իրենք պետք է հավաքեն այս գումարները և բերեն: Բայց մյուս կողմից էլ` տեղեկանքը տալիս է մի կառույց, գրանցում է մյուսը»,- նշեց Իշխան Զաքարյանը և նկատեց, որ այստեղ նաև օրենսդրական խնդիր կա: Այսօրվա նիստում ՎՊ խորհուրդը ոչ մի գործ չուղարկեց դատախազություն: