Այսօր Հայաստանի տնտեսական վիճակի մասին «Հայացք» ակումբում կանխատեսումներ արեցին Ֆինանսների փոխնախարար Վարդան Արամյանը, ԱԺ պատգամավոր, ԱԺ տնտեսական հարցերի մշտական հանձնաժողովի փոխնախագահ  Վարդան Բոստանջյանը, ԿԲ նախկին նախագահ, ՀԱԿ ներկայացուցիչ Բագրատ Ասատրյանը: Ներկա իրավիճակը գնահատելով` փոխնախարար Վարդան Արամյանը նշեց, որ տնտեսության 16.3 % անկումը հիմնականում նկատելի է շինարարության և արդյունաբերության ոլորտներում: Նախորդ տարվա առաջին կիսամյակի համեմատ շինարարությունը 53.5 %  անկում է գրանցել, իսկ արդյունաբերությունը` 11.5 %: «Անկումները շատ ավելի խորն էին, քան մենք ակնկալում էինք եռամսյակներ առաջ»,- խոստովանեց փոխնախարարը: Վարդան Արամյանը նշեց, որ համաշխարհային տնտեսության համար կանխատեսումները նույնպես չեն արդարացել, անկումը ավելի խորն է եղել: Իսկ  Հայաստանի տնտեսական զարգացումը համահունչ է համաշխարհային զարգացումներին: Ֆինանսների փոխնախարարը տեղեկացրեց, որ իրենք մինչև տարվա վերջ կանխատեսում են ունենալ 12-15 % անկում: «Ճգնաժամը համառորեն թակում էր մեր դուռը, բայց մենք ասում էինք, թե այն ազդեցություն չի ունենալու մեր համար: Դա ոչ վաղ անցյալում էր: Իրականում, բոլոր այն մարդիկ, ովքեր կանխատեսումներ են անում կարճ ժամանակի համար, երևի թե իրենց մոտ դա լավ չի ստացվում: Այս պարագայում մենք պետք է, խեղճ տեսք ընդունելով, օտարների փողեր ուզենք և ներարկենք մեր տնտեսություն, որ իբր թե տնտեսությունը մի փոքր աշխուժանա, դա վատագույն դեպքում շատ լավ բան է»,- ասաց ԱԺ պատգամավոր, ԱԺ տնտեսական հարցերի մշտական հանձնաժողովի փոխնախագահ Վարդան Բոստանջյանը: Փորձելով իրական գնահատական տալ տնտեսական ներկա վիճակին` Վարդան Բոստանջյանը նկատեց, որ արդյունաբերությունը, գյուղատնտեսությունը տնտեսական աճ չեն կարող ապահովել: Իսկ շինարարությունը այս պահին խոցելի վիճակում է: «Մենք տեսնում ենք, որ պարզապես կանգանծ են շինարարության բազմաթիվ օբյեկտներ,-ասաց բանախոսը:- Ավելի աշխույժ է մեր արտահանում-ներմուծում հարաբերակցության ցուցանիշը, որը գրեթե մոտիկանում է 1/7-ի հարաբերակցության: Մենք, փաստորեն, վճարում ենք ուրիշի կողմից ստեղծածի համար»: Այդուհանդերձ, Վարդան Բոստանջյանը նշեց, որ կառավարությունը ինչ-որ բան անում է, որ Հայաստանը դուրս գա ճգնաժամից և կանխատեսեց, որ դուրս կգանք այդ իրավիճակից, առավել ևս` Ֆրանսիայում, Գերմանիայում, ԱՄՆ-ում կարծես թե կասեցվել է ճգնաժամը, որը կհասնի նաև Հայաստան, բայց 2010 թվականին: ԿԲ նախկին նախագահ, ՀԱԿ ներկայացուցիչ Բագրատ Ասատրյանը հիշեցրեց, որ դեռևս անցյալ տարվա վերջին գնահատական էր տվել, որ Հայաստանի տնտեսության անկումը կանխատեսված էր մոտ 20 %: «Կիսամյակը ցույց տվեց, որ մեր վատագույն կանխատեսումը իրական է: Տատանումները հիմնականում պայմանավորված էին շինարարության փաստացի ծավալների ավելի մեծ անկմամբ, քան նախատեսված էր: Մենք այս պահին ունենք առևտրի և սպասարկման ոլորտի զարմանալի աճ: Իմպորտի 27-28 % կրճատում ունենք, արդյունաբերության 11 %-ից ավելի բարձր անկում ունենք, բայց առևտուրը աճում է»,- ասաց Բագրատ Ասատրյանը: Նրա խոսքերով` առևտրի աճը պայմանավորված է մեծ ստվերի և կառավարության տարբեր միջոցառումների, ՀԴՄ-ների կտրոնների խաղարկությամբ: Բագրատ Ասատրյանի լավատեսական կանխատեսմամբ, անկումը շարունակվելու է: 2010 թ-ին անցյալ տարվա անկմանը կգումարվի նաև 1-1.5 % անկում:  Հիմնականում նկատելի է լինելու առևտրի և սպասարկման ոլորտներով, փոքր աճ նախատեսվում է շինարարության, արդյունաբերության, գյուղատնտեսության ոլորտներում: «Բայց բոլորս էլ հասկանում ենք, որ Հայաստանի համար որոշիչ են  լինելու այն զարգացումները, որոնք լինելու են Ռուսաստանում: ԵՄ-ն մեր տնտեսության վրա համարյա ազդեցություն չի թողնում»,- կարծում է բանախոսը: ԱՊՀ անդամ երկրները ամփոփել են իրենց երկրների տվյալները, և վատագույն ցուցանիշներ են ցուցաբերել Ուկրաինան` մոտ 30 % անկում, Հայաստանը` 16.3 %,  Ռուսաստանը` 12 %: Փոխնախարար Վարդան Արամյանն էլ փաստեց, որ ԱՊՀ-ի համար արդեն իսկ կայուն վիճակի հասնելու միտումներ կան: «Եթե Ռուսաստանի տնտեսությունում 2010 թվականին դրակամ միտումներ նշմարվեն, և տնտեսական աճը կազմի առնվազն 3 %, այս պարագայում կարող ենք սպասել, որ Հայաստանում տնտեսական աճը կվերականգնվի լավագույն դեպքում 2011 թ.-ին»,- կանխատեսեց Բագրատ Ասատրյանը: Բագրատ Ասատրյանը հայտարարեց, որ դրական միտումներ չկան, չեն էլ սպասվում, քանի որ Հայաստանում հակաճգնաժամային ծրագիր գոյություն չունի: Սակայն փաստելով, որ կառավարությունը փորձում է արտաքին միջոցներով իրավիճակը փոխել, Բագրատ Ասատրյաը նշեց, որ հիվանդությունը պետք չէ հիվանդության պատճառով բուժել, այսինքն` ոչ թե փողի ներհոսքով, այլ անհրաժեշտ են համակարգային փոփոխություններ, համալիր ծրագիր, որ պետք է ներառի կյանքի բոլոր հատվածները, այդ թվում նաև քաղաքական: