Այսօր «Հայելի» ակումբում դեռահասների վրա ԶԼՄ ազդեցության շուրջ բանավիճեցին  ԱԺ պատգամավոր Անահիտ Բախշյանը, գրող Մարինե Պետրոսյանը եւ հոգեբան Սվետլանա Հարությունյանը: Հեռուստատեսության ազդեցությունը բաժանելով երեք մասի` հեռուստածրագրեր, ֆիլմեր և գովազդ,  հոգեբան  Սվետլանա Հարությունյանը նշեց, որ այսօր ոչ մի զտում հեռուստատեսությունը չի կատարում. չեն իրականացվում ոչ մոնիտորինգ, ոչ ուսումնասիրություններ, որպեսզի պարզեն հեռուստատեսության ազդեցությունը հատկապես դեռահասների վրա: «Այսօր մենք ունենք ինֆորմացիոն էկոլոգիայի խնդիր, ճիշտ այնպես, ինչպես  շրջակա միջավայրի էկոլոգիական խնդիրներն են, որը անգամ 10 տոկոսով չի լուծվում»,-ասաց հոգեբանը: Հոգեբանի խոսքերով, ի տարբերություն նախադպրոցական տարիքի, դեռահասները կարող են որոշել` ինչ նայեն և ինչ` ոչ: Սակայն ցուցադրվող ֆիլմերում չափից շատ ագրեսիվություն կա: Իսկ դա բերել է նրան, որ այսօր դեռահասների մոտ ագրեսիան չափազանց բարձր է, որում ոչ վերջին դերը հեռուստատեսությանն է: Ըստ համապատասխան ուսումնասիրությունների` աշխարհում դեռահասները մեկ տարվա ընթացքում դիտում են մինչև 4 000 ագրեսիայի տեսարաններ, որը նրանց դեռ չձևավորված հոգեկանի վրա մեծ ազդեցություն է թողնում: Մարինե Պետրոսյանն էլ կարծում է, որ ագրեսիան միշտ չէ, որ բացասական է, քանի որ այն մարդուն դրդում է  գործողություն կատարել, չհաշտվել իրականության հետ: «Մեր կյանքում և երիտասարդության մեջ շատ ավելի վտանգավոր է կոմֆորմիզմը, իսկ ինքը եթե բողոքի, դրանից վնասն ավելի քիչ է, քանի օգուտը»,-ասաց Մ.Պետրոսյանը: Թե ֆիլմերը, թե ծրագրերը, ըստ հոգեբան Սվետլանա Հարությունյանի, արտացոլում են ոչ միայն իրականությունը, որն առկա է այսօր Հայաստանում, այլև նրանք ձևավորում են այդ իրականությունը, և նրա կարծիքով` այնքան էլ ճիշտ չէ ամեն ինչ մանրակրկիտ ցուցադրել, որովհետև դա հուսահատության և անելանելիության զգացմունք է ծնում: Անահիտ Բախշյանը, որպես երկար տարիների փորձ ունեցող մանկավարժ, կարևորեց կրթության ոլորտից այս ամենի բարեփոխումը սկսելը: Որպեսզի հեռուստատեսությունում լինի ընտրություն, ըստ Մ.Պետրոսյանի՝ պետք է դրական կերպար լինի, որն այսօր չկա: «Որոգայթի» Հովոն է դարձել ամենադրական կերպարը: Ի դեպ, Անահիտ Բաղշյանը խոստովանեց, որ նույնպես նայում է «Որոգայթը», ինչպես ինքն է ասում` ժամն է հարմար: Սվետլանա Հարությունյանը կարծում է, որ անհրաժեշտ է դաշտում լուրջ ուսումնասիրություններ կատարել, թե ինչպիսի իրավիճակ է տիրում այսօր հեռուստաոլորտում` հոբեբանության տեսանկյունից: «Գրիգոր Ամալյանի հանձնաժողովը պիտի անի, որն անգործության է մատնված: Հանրային հեռուստատեսությունը բյուջեից 10 մլն դրամ է ստացել հասարակական կարծիքի ուսումնասիրման համար:  Գումար նախատեսվում է, բայց իրականում ի՞նչ է արվում, և այդ ուսումնասիրության արդյունքում մենք ռեալ պատկեր հաստատ չունենք: Այդտեղից էլ եզրակացնում ես, որ այսօր Հանրային հեռուստատեսությանը չի հետաքրքրում, թե իր հաղորդումների արդյունավետությունն ինչպիսին է, ում վրա ինչպե՞ս է ազդում և այլն»,-ամփոփեց Ա. Բախշյանը: