Ծաղկաձորում գտնվող «Գոլդեն փելիս» հյուրանոցի սեփականատեր, գործարար Նարեկ Նալբանդյանը մտնում է հանքարդյունաբերության ոլորտ։ 2024թ․ հոկտեմբերի 17-ին նա դարձել է Մեղրաձորի ոսկի-բազմամետաղների հանքավայրը շահագործող «Մեղրաձոր գոլդ» ՍՊԸ-ի 33 %-ի բաժնետեր։

«Մեղրաձոր գոլդ»-ում միակ բաժնետերը, հիշեցնենք, Վարդան Մարգարյանն էր։ Այժմ նա բաժնեմաս չունի, փոխարենը 34 % բաժնեմաս ունի նրա որդին՝ Նարեկ Մարգարյանը։ 

«Մեղրաձոր գոլդ»-ի բաժնեմասերի մնացած 33 %-ը ձեռք է բերել Արտեմ Համլետի Սահակյանը: Նա Նարեկ Նալբանդյանի գործընկերն է։

Նարեկ Նալբանդյանն ու Արտեմ Սահակյանը հոկտեմբերի 2-ին նոր ընկերություն են հիմնել՝ «Հանքագործ» ՍՊԸ-ն, որտեղ հավասար բաժնեմաս ունեն։

Արտեմ Սահակյանը նաև շինարարությամբ զբաղվող «Լիբրեյթ» ՍՊԸ-ի միանձնյա սեփականատերն է, որը Նաիրի Զարյան 140 հասցեում այս պահին բազմաբնակարան շենք է կառուցում։

Արտեմ Սահակյանը ներկայացված է մի շարք այլ ընկերություններում՝ «Լեվել Շին» ՍՊԸ-ում հավասար մասնակցություն ունի ազատ ոճի ըմբշամարտիկ Դավիթ Սաֆարյանի (Դևիդ Հովիկի Սաֆարյան) հետ, բաժնետեր է նաև «Թ.Ֆ.ՇՈՓ» ՍՊԸ-ում, որտեղ փոխարինել է Երևանի քաղաքապետարանի աշխատակազմի ճարտարապետության և քաղաքաշինության վարչության նախկին պետ Արսեն Լալայանցին։ Այդ ընկերությանն է պատկանում Պռոշյան փողոցում գտնվող  «Տոռա պալաս» հյուրանոցային և ռեստորանային համալիրը։

Մեղրաձորի ոսկի-բազմամետաղների հանքավայրը, հիշեցնենք, շահագործվում է 2012թ․-ից։ «Մեղրաձոր գոլդ» ՍՊԸ-ի ընդերքօգտագործման իրավունքի ժամկետն այս հանքավայրի համար ավարտվում էր 2023թ. սեպտեմբերի 10-ին: 

Դեռեւս 2022 թվականի գարնանը «Մեղրաձոր գոլդ» ՍՊԸ-ն շրջակա միջավայրի վրա ազդեցության գնահատման (ՇՄԱԳ) նախագիծ է ներկայացրել՝ ընդերքօգտագործման իրավունքը երկարացնելու նպատակով: 2022թ. հուլիսի 27-ին Շրջակա միջավայրի նախարարությունը բացասական եզրակացություն էր տվել «Մեղրաձոր գոլդ» ՍՊԸ-ի նախագծին: 

Չնայած դրան, «Մեղրաձոր գոլդ» ՍՊԸ-ն դատական կարգով երկարացրեց ընդերքօգտագործման իրավունքը մինչեւ 2040թ. մայիսի 1-ը: 

Ընդերքօգտագործման պայմանագրի համաձայն՝ Մեղրաձորի հանքավայրում 60 հզր տոննա ապրանքային հանքաքար է հաստատված, որտեղ 4753,5 կգ ոսկի կա։ 

Արդյունահանող ճյուղերի թափանցիկության նախագծի զեկույցների համաձայն՝ «Մեղրաձոր գոլդ»-ի ոսկու պարունակությամբ թանկարժեք մետաղի խտանյութի արտադրությունը 2017–2021թթ․ ավելացել է:  

2022-24թթ․ տվյալները դեռևս հասանելի չեն. ԱՃԹՆ վերջին զեկույցը հրապարակված չէ։ 

Համաձայն նույն զեկույցի՝ «Մեղրաձոր գոլդ» ՍՊԸ-ի արտադրանքը՝ ոսկու պարունակությամբ թանկարժեք մետաղի խտանյութը 2017–2021թթ․  արտահանվել է Շվեյցարիա։ 

Վարդան Մարգարյանի հետ զրուցել առայժմ չի հաջողվել։ Նա զանգերին չի պատասխանում։ Չի արձագանքում նաև WhatsApp-ին ուղարկված մեր հաղորդագրությանը։ 

Հեռախոսազանգին չպատասխանեց նաև Նարեկ Նալբանդյանը։ Նրան ուղղված մեր տեքստային հաղորդագրությունը եւս անպատասխան մնաց։ 

Ավելացված: Հոդվածի հրապարակումից ժամեր անց Նարեկ Նալբանդյանը զանգահարեց և պատմեց, որ պայմանավորված մետաղների գների բարձրացմամբ` հետաքրքրություն է առաջացել մետաղական հանքերի նկատմամբ, և քանի որ «Մեղրաձոր գոլդ»-ը վաճառքի էր հանված` ընկերությունում եղած խնդիրների, աշխատավարձերի պարտքերի պատճառով, իրենք էլ որոշել են ձեռք բերել դրա բաժնետոմսերը և նոր թափով շահագործել Մեղրաձորի հանքավայրը: 

Նարեկ Նալբանդյանը նաև գործարքի արժեքը չթաքցրեց` իր բաժնեմասի համար վճարել է 3 մլն դոլար, նույնչափ էլ` գործընկերը` Արտեմ Սահակյանը: Այդ միջոցներն իրենք ներգրավել են  «Ամերիաբանկ»-ից:  Նորաստեղծ  «Հանքագործ»  ՍՊԸ-ն հենց այդ նպատակով է հիմնադրվել, բանկի վարկը վերցրել է «Հանքագործ»  ՍՊԸ-ն և փոխառությամբ տրամադրել իրենց այս գործարքի համար: 

Նարեկ Նալբանդյանը նաև նշեց, որ այլ նմանատիպ հանքավայրերում բաժնեմասի վաճառքի պարագայում իրենք պատրաստ են գնել նաև հանքավայրեր շահագործող այլ ընկերության բաժնետոմսեր:

Գլխավոր լուսանկարը՝ Տիրայր Մուրադյանի