Հունիսի 6֊ին Արմենիա Մարիոթ հյուրանոցում  կայացավ «Ապահովելով հասանելիություն բոլորին` Եվրոպա և տարածաշրջան» խորագիրը կրող Կապի եվրոպական գագաթնաժողով 2023֊ի բացման արարողությունը։

«Հայաստանի օպերատորների միություն»  ՀԿ-ի տարածած հաղորդագրության համաձայն՝ գաթնաժողովի նպատակն է համախմբել մասնագետներին և շահագրգիռ կառույցներին ամբողջ աշխարհում, այդ թվում՝ Հայաստանում` գտնելու լուծումներ հեռավոր համայնքներում ինտերնետ հասանելիություն ապահովելու հնարավորությունների ստեղծման համար: 

Միջոցառմանը ներկա էին բարձրաստիճան պաշտոնյաներ, ոլորտի ներկայացուցիչներ, միջազգային գործընկերներ Վրաստանից, Հունաստանից և Ղրղզստանից։

«Ուրախ եմ ողջունելու բոլորիդ Կապի Եվրոպական գագաթնաժողովին, որն անցակցվում է  Հայաստանում առաջին անգամ: Վստահ եմ, որ այստեղ ներկաներին միավորում է համընդհանուր գաղափարը, և հույս եմ հայտնում, որ այս երկու օրերի միասնական ջանքերով կգտնենք ուղիներ` կրճատելու աշխարհի` դեռևս օֆֆլայն հատվածում գտնվող բնակչության թիվը», -նշեց Հայաստանի Օպերատորների միության տնօրեն Քրիստինե Գյոնջյանը։

Ինտերնետ կապն այսօր առաջնահերթությունների շարքում է և ստեղծում է հավասար հնարավորություններ համայնքների համաչափ զարգացման համար:

«Հայաստանն ինտերնետի հասանելիության տեսանկյունից բավականին լավ դիրքերում է ամբողջ աշխարհում, որը միևնույն ժամանակ ենթադրում է  անվտանգության և ինտերնետի հասանելիության հարցում երեխաների համար որոշակի սահմանափակումներ։ Այս առումով օրենսդրական մակարդակում աշխատանք է տարվում՝ ընտանիքների, երեխաների, դպրոցների եւ որոշակի խմբերի համար անհրաժեշտ գործիքակազմ ստեղծելու նպատակով»,- նշեց ԱԺ փոխնախագահ Հակոբ Արշակյանը։

Չնայած տեխնոլոգիաների գերարագ զարգացմանը` այսօր ամբողջ աշխարհում բնակվող 8 միլիարդ մարդուց մոտ 2,7 միլիարդը դեռ ինտերնետ հասանելիություն չունի` կախված աշխարհագրական դիրքից, ենթակառուցվածքների պակասից և բնակչության սակավությունից։ Իսկ հասանելիություն ապահովելը պահանջում է նոր` ոչ ավանդական մոտեցումներ:

«ՀՀ կառավարության 2021-2026թթ. ծրագրով նախատեսված է, որ մինչև 2026 թվականը Հայաստանի բնակավայրերի 80 տոկոսն ապահովվի լայնաշերտ ինտերնետի հասանելիությամբ, որը բավականին մեծ ցուցանիշ է ամբողջ աշխարհում։

Ներկայում մենք առաջանցիկ տեմպերով ենք ընթանում դեպի այդ ցուցանիշը։ Արդեն իսկ Հայաստանի Հանրապետության բնակավայրերի 66,5 տոկոսն ապահովված է լայնաշերտ ինտերնետով, որը ներառում է բնակչության  96 տոկոսը։ Հատկանշական է նաև, որ այն բնակավայրերը, որոնք չունեն լայնաշերտ ինտերնետի հասանելիություն, ապահովված են շարժական ինտերնետով»,- նշեց Բարձր տեխնոլոգիական արդյունաբերության նախարարի տեղակալ Ավետ Պողոսյանը։

Երբ համայնքը միավորվում է կառուցելու սեփական ցանցը, համայնքային ցանցերը դիտարկվում են որպես ինտերնետ հասանելիություն ապահովելու այլընտրանքային մոտեցումներ։ Նմանատիպ ցանցերը շահույթ չեն հետապնդում, սակայն հիանալի միջոց են ողջ աշխարհում նվազեցնելու առանց ինտերնետ հասանելիության համայնքների թիվը: Միևնույն ժամանակ սրանք կարող են օգնել կամրջել թվային անջրպետը և նպաստել մի շարք ոլորտների, այդ թվում` բիզնեսի,  կրթության և տուրիզմի զարգացմանը։

«Կապի Եվրոպական գագաթնաժողովը հիանալի հարթակ է ոլորտի մասնագետների միջև գիտելիքի և փորձի փոխանակման համար։ Հուսով եմ այս երկու օրերի ընթացքում տեղի ունեցող քննարկումները և  ձեռքբերումները հետագա համագործակցությունների հիմք կհանդիսանան` ապահովելու հասանելիություն ամենուր»,- նշեց «Ինտերնետ հասարակություն» կազմակերպության վաստակավոր տեխնոլոգ Միչուկի Մուանգին։

Աշխարհի բնակչության 1/3֊ը դեռ Ինտերնետ հասանելիությամբ ապահովված չէ։ Մարդիկ ողջ աշխարհում, այդ թվում նաև` Հայաստանում, համախմբվում և կառուցում են իրենց սեփական Ինտերնետ կապը` համայնքային ցանցերի, կոոպերատիվների և կապի այլ լրացուցիչ լուծումների միջոցով` ապահովելով հասանելիություն ամենուր։

«Մեր անելիքները շատ են ինտերնետի և արհեստական բանականության ոլորտում, և մենք պետք է աշխատենք, որպեսզի բոլոր հնարավորությունները Հայաստանում օգտագործենք ի օգուտ Հայաստանի բնակիչների»,-նշեց «Ինտերնետ հասարակության Հայաստան հատված» ՀԿ նախագահ Իգոր Մկրտումյանը։

Կապի եվրոպական գագաթնաժողովի համակազմակերպիչներն են Internet Society (Ինտերնետ հասարակություն, ԱՄՆ) կազմակերպությունը և Հայաստանի օպերատորների միությունը՝ ՀՀ Բարձր տեխնոլոգիական արդյունաբերության  նախարարության աջակցությամբ։

Միջոցառման գործընկերներն են «Արփինետ» ընկերությունը, «Ինտերնետ հանրություն» ՀԿ-ն, «Համայնքային ցանցեր» զարգացման հիմնադրամը,  «Ինտերնետ հասարակության Հայաստան հատված» ՀԿ-ն :

Internet Society֊ի մասին

Internet Society֊ն (Ինտերնետ հասարակություն) ձևավորվել է 1992թ. Վինթ Սըրֆի, Բոբ Քանի և այլոց կողմից, ովքեր Ինտերնետի տեխնիկական զարգացման գործում առաջամարտիկներից են եղել։

Internet Society֊ն աջակցում և նպաստում է ինտերնետի զարգացմանը՝ որպես գլոբալ տեխնիկական ենթակառուցվածք, մշակում է համացանցի օգտագործման քաղաքականություն, կառուցում է համայնքային ցանցը և նպաստում վերջինիս աշխատունակության ապահովմանը։

Կազմակերպության աշխատանքը հավատարիմ է նպատակներին, որպեսզի ինտերնետը լինի բաց, գլոբալ կապակցված, անվտանգ և վստահելի` ձգտելով համագործակցել բոլոր նրանց հետ, ովքեր կիսում են այս նպատակները:

Հայաստանի օպերատորների միության մասին

«Հայաստանի օպերատորների միություն» ՀԿ ստեղծվել է 2016 թվականի դեկտեմբերին` միավորելով հեռահաղորդակցության և հարակից ոլորտների ընկերություններին և ներկայացնելով նրանց շահերը ներպետական և միջազգային կառույցներում։

Միությունն իր նպատակների իրագործման ընթացքում կոչված է նպաստել ինտերնետի ու հեռահաղորդակցության ոլորտների զարգացմանը, գործարար մթնոլորտի բարելավմանը, ինտերնետի և հեռահաղորդակցության ոլորտների օրենսդրական դաշտի բարելավմանը, ՏՀՏ ոլորտի կրթական ծրագրերի արդիականացմանը և թվային գրագիտության բարձրացման ուղղված խնդիրներ։

Բազմակողմանի գործունեության հիմքում երկրի հավասարաչափ զարգացումն է, ՀՀ ողջ տարածքում որակյալ կապի հասանելիության ապահովմանը նպաստելը և  համացանցի անվտանգ կիրառությունը։