Ազգային ժողովում այսօր արտահերթ նիստ է հրավիրվել՝ ընտրելու Կենտրոնական ընտրական հանձնաժողովի (ԿԸՀ) նախագահին ու վեց անդամին: 

ԿԸՀ նախագահի թեկնածու Վահագն Հովակիմյանին հարցեր տալու համար հերթագրվել էր երեք պատգամավոր: Պատգամավոր Հակոբ Ասլանյանին հետաքրքրում էր՝ ժողովրդավարությունը ԿԸՀ նախագահի թեկնածու Հովակիմյանի համար «օդ է, ջուր է, հող է, թե՝ կրակ»:

«Պետության զարգացման բանաձև է, որովհետև աշխարհի տարբեր երկրներ իրենց զարգացման տարբեր բանաձևերն ունեն: Կոնկրետ ինձ համար ժողովրդավարությունը դա պետության զարգացման բանաձև է, որը մեր դեպքում, իմ կարծիքով, որպես սահմանափակ ռեսուրս ունեցող երկրի, միակ բանաձևն է»,- պատասխանեց Վահագն Հովակիմյանը:

Սերգեյ Բագրատյանին էլ հետաքրքրեց թեկնածուի այն դիտարկումը, որ սահմանափակ ռեսուրս ունեցող մեր երկրի համար պետության միակ զարգացումը ժողովրդավարությունն է: Նա հետաքրքրվեց, եթե սահմանափակ ռեսուրս չունենայինք, այլ ընթացքո՞վ պետք է գնայինք:

Պատգամավորի հարցն ուներ նաև երկրորդ մաս, ժողովրդավարւթյունը՝ որպես ինստիտուտ, արդյոք կարող է ազդել բանակի մարտունակության վրա, եթե ժողովրդավարության վերջնական փուլին դեռ չես հասել:

Վահագն Հովակիմյանը, պատասխանելով հարցին, նշեց, որ ինքը հավակնում է մի պաշտոնի, որը ենթադրում է քաղաքական չեզոքություն, զսպվածություն, ուստի պետք է կարճ ասի:

«Ժողովրդավարությունն ինքը տալիս է երկրի զարգացման բոլոր հնարավորությունները բոլոր ոլորտներում: Դա իմ համոզմունքն է»,- ասաց Վահագն Հովակիմյանը:

Հավանաբար Սերգեյ Բագրատյանին չգոհացրեց պատասխանը և դարձյալ հետաքրքրվեց՝ Հովակիմյանի համար ժողովրդավարությունը «պրագմատիկ հաշվարկ է, թե ընտրություն»:

«Ե՛վ մեկը, և՛ մյուսը»,- պատասխանեց Հովակիմյանը:

Պատգամավոր Զարուհի Բաթոյանը հիշեցրեց, որ թե՛ ինքը, թե՛ Վահագն Հովակիմյանը եղել են «Քաղաքացիական պայմանագիր» կուսակցության հիմնադիր անդամ: Հովակիմյանը եղել է նաև կուսակցության վարչության անդամ: Ըստ Բաթոյանի, այդ քաղաքական կենսագրությունը մարդկանց թույլ է տալիս հնչեցնելու քննադատական խոսքեր:

«Արդյոք նշված հանգամանքները և հարուստ կենսագրությունը ձեզ չի՞ կաշկանդելու հետագայում, որպես ԿԸՀ նախագահ, գործելու ազատ: Եթե ոչ, ուզում եմ նաև նշեք՝ որո՞նք են այն հիմնավորումները և հիմքերը, որոնք թույլ են տալու ձեզ ազատ գործել»,- հետաքրքրվեց Զ. Բաթոյանը:

Վահագն Հովակիմյանը, պատասխանելով հարցին, մեջբերեց Սահմանադրությունից հատված, որ Կենտրոնական ընտրական հանձնաժողովի անդամներն իրենց լիազորությունների իրականացման ժամանակահատվածում չեն կարող լինել որևէ կուսակցության անդամ կամ որևէ այլ կերպ զբաղվել քաղաքական գործունեությամբ: Հրապարակային ելույթներում նրանք պետք է ցուցաբերեն քաղաքական զսպվածություն:

Ըստ Հովակիմյանի, եթե սահմանադրի կամքը լիներ, որ ԿԸՀ-ի անդամ չեն կարող լինել կյանքում երբևէ կուսակցական գործունեություն ծավալած կամ ՀԿ անդամ եղած անձինք, ապա դա պետք է սահմանվեր հենց Սահմանադրությամբ:

«Իմ համոզմամբ, ցանկացած պաշտոնում, եթե չկա իրավական խոչընդոտ, անձը պետք է ընտրվի իր սկզբունքների, իր կենսագրության հաշվի առմամբ»,-ասաց քաղաքական կենսագրություն ունեցող Հովակիմյանը:

Վահագն Հովակիմյանը նշեց, որ 1998թ.-ից պայքարել է ազատ, արդար, մրցակցային ընտրություններ ունենալու համար: