Ջավախքցիները նախագահական ընտրությունների ժամանակ օգնել են իշխող կուսակցությանը` ակնկալելով, որ կուսակցությունն էլ համապատասխան վերաբերմունք կդրսևորի Ջավախքի խնդիրների վերաբերյալ, բայց, ցավոք սրտի, ընդհանրապես այդ մասին չի խոսվել, խնդիրներն էլ գնալով բարդացել են: Այս կարծիքին է Սամցխե-Ջավախքի հայկական հասարակական կազմակերպությունների խորհրդի համակարգող, «Ա-ինֆո» գործակալության տնօրեն Արտակ Գաբրիելյանը, ով ամեն տարի Ջավախքի հարցում նահանջ է արձանագրել:

ՀՀ խորհրդարանական ընտրություններից ակնկալիք ունե՞ք:

Դրա համար պետք է մի քիչ վերլուծություն ունենաս, թե որ քաղաքական ուժը ինչ դիրք կունենա խորհրդարանում: Իրականության մեջ ասեմ, որ ակնկալիքներ այդքան էլ չունեմ, որովհետև քաղաքական դաշտում գրեթե այն կուսակցություններն են, որոնք նախկինում նույնպես եղել են: Եթե այդ կուսակցությունները կամ կուսակցության ղեկավարներն ուզենային ինչ-որ աշխատանք տանել, կտանեին մինչև հիմա, այսինքն` տարբերություն չեմ տեսնում ես ներկա խորհրդարանի և ապագա խորհրդարանի միջև: Մի կուսակցության պատգամավորների թիվը մի քիչ աճելու է, մյուսինը` նվազելու է: Չեմ կարծում, որ ինչ-որ բան կփոխվի:

Այս խորհրդարանում ջավախքցի երեք պատգամավոր կար: Ըստ Ձեզ` նրանք որևէ կերպ չե՞ն անդրադարձել ջավախքցիներին հուզող խնդիրներին, և, ընդհանրապես, ինչպե՞ս եք գնահատում նրանց գործունեությունն այս տարիներին:

Այդ երեք պատգամավորրները փորձել են ավելի շատ խորհրդարանի մակարդակով հարցերը լուծել և ինչ-որ հասարակական գործունեություն են ծավալել Ջավախքում, ասենք` բարեգործությունների տեսքով կամ հասարակական առումով: Ես չեմ կարող գնահատական տալ և ասել, թե իրենք ավելին կարող էին անել, բայց չեն արել: Ընդհանուր առմամբ բավարար է, բայց ցանկալի էր ավելի շատ:

Իսկ ի՞նչ էիք ուզում, որ անեին, որը չեն արել նրանք:

Պատգամավորներից կային անձինք, ովքեր միջկառավարական հանձնաժողովի անդամներ են, որ կարող էին միջակառավարական կամ խորհրդարանական հանձնաժողովի համատեղ նիստերի ընթացքում առանձին Ջավախքի հարց բարձրացնել: Տեղյակ եք, որ Ջավախքի հարցը քննարկվում է  վիրահայության հարցերի կոնտեքստում, բայց բոլորս էլ գիտենք, որ վիրահայության խնդիրները ջավախահայության խնդիրներից բավականին տարբեր են: