«Տեղեկատվության ազատության մասին» օրենքը փոխելը միմիայն մեկ նպատակ ունի՝ եթե Շրջակա միջավայրի նախարարությունից պահանջում են տեղեկատվություն Կարմիր գրքում գրանցված կենդանիների բնադրավայրերի մասին, ապա նախարարությունը պետք է կարողանա դա մերժել։ Այսօր տարեվերջյան ասուլիսի ժամանակ, լրագրողների հարցին ի պատասխան, պարզաբանեց Շրջակա միջավայրի նախարար Էրիկ Գրիգորյանը։

Նա վստահեցրեց, որ որևէ այլ փոփոխություն չէր նախատեսվում այդ օրենքով։ Իսկ փոփոխության անհրաժեշտություն առաջացել է այն պատճառով, որ որևէ անձ կարող է ցանկանա ստանալ Կովկասյան ընձառյուծի, կամ Կարմիր գրքում գրանցված այլ կենդանատեսակի բնադրավայրի մասին տեղեկատվություն, կոնկրետ GPS կոորդինատներ, ինչից խուսափելու և ապահովագրվելու համար նախարարությունը փորձել է օրենքի շրջանակներում կարգավորել և չտրամադրվել այդ տեղեկատվություն։

«Ինչու էր այդ աղմուկը, այդ քննարկումը՝ ոտնձգություն տեղեկատվության ազատության հիմնարար սկզբունքների վրա և այլն, ընդ որում՝ հանրային լսում է եղել հասարակական կազմակերպությունների հետ, և նախնական տարբերակը ես անձամբ եմ վերադարձրել, որտեղ որ նման ձևակերպումը կար, որ ՇՄՆ-ն կարող է չտրամադրել որոշ տեղեկատվություն։ Ես ասել եմ, որ սա չի կարող ընդունելի լինել, և եթե մեր խնդիրը կենդանիների պաշտպանությունն է, պետք է գրել, թե որ դեպքում դա չպետք է տրամադրել»,- մանրամասնեց Էրիկ Գրիգորյանը։

Հիշեցնենք, որ նախարարությունը օրենքի փոփոխության նախագիծ է ներկայացրել, որով կարող է մերժել տրամադրել բուսական և կենդանական աշխարհի հազվագյուտ տեսակների բազմացման վայրերի մասին տեղեկատվություն: